گندگی،خراب سیوریج سسٹم، شہری مختلف امراض کا شکار
کراچی (مانیٹرنگ ڈیسک )شہر قائد میں گندگی اور سیوریج سسٹم خراب ہوجانے کے باعث شہریوں میں مختلف امراض جنم لینے لگے۔۔
، شہر کے پوش علاقوں کے علاوہ کچی آبادیوں، پسماندہ و مضافاتی علاقوں میں ملیریا کے ساتھ خسرہ اور ڈینگی کے کیسز بھی اضافہ ہوتا جارہا ہے ،حکومت اور شہری ادارے بھی کوئی موثر حکمت عملی طے کرنے میں ناکام ہیں۔ اکثر علاقوں میں صفائی کے ناقص انتظامات ہیں، اہم شاہراہوں پر مٹی کے ڈھیر جمع ہوگئے ہیں جبکہ ٹریفک کی روانی کے باعث دھول اور مٹی اڑنے سے شہری نزلہ، زکام ،کھانسی ،ہلکے بخار کا شکار ہورہے ہیں ۔ متاثرہ افراد میں سانس کی بیماری، دمہ، دھول مٹی سے الرجی اور کم قوت مدافعت والے بچے ،نوجوان اور بزر گ شامل ہیں۔شہر میں جگہ جگہ گندگی کے ڈھیر لگنے کے باعث مچھر اور مکھیوں کی بھرمار ہوچکی ۔ ماہرین کا کہنا ہے کہ شہر کی ابتر صورتحال کے باعث انسانی صحت پر بھی اثر ہورہا ہے ، کم قوت مدافعت کے حامل افراد زیادہ جلدی متاثر ہورہے ہیں ، شہریوں کی بڑی تعداد نزلہ ، زکام ،کھانسی،، چھینکیں آنے ، گلے میں درد وخراش، جسم میں درد اور ہلکے بخارکی شکایت کے ساتھ اسپتالوں میں آ رہی ہے ۔ ماہرین نے مزید کہا کہ کراچی سمندر کے قریب ہے اور یہاں دھول مٹی بہت زیادہ ہوتی ہے ، کراچی کے لوگوں کی قوت مدافعت کم ہے ، ان پر بیکٹیریاز اور مختلف وائرس زیادہ اثر انداز ہوتے ہیں، اس کی وجہ یہ ہے کہ ا کثر شہری بے احتیاطی سے کام لیتے ہیں۔
