پارکو میں تیل چوری کے ملزمان کے ریمانڈ میں توسیع
کراچی (اسٹاف رپورٹر)انسداد دہشت گردی کی عدالت نے پارکو میں کروڑوں روپے کے تیل کی چوری کے مقدمے میں ملزمان کے ریمانڈ میں 9 اپریل تک توسیع کردی۔
انسداد دہشتگردی کی منتظم عدالت کے روبرو پارکو میں کروڑوں روپے کے تیل کی چوری کے مقدمے کی سماعت ہوئی۔ پولیس نے زخمی ملزم سمیت 6 ملزمان کو پیش کیا۔ ملزمان میں محمد یاسر، فیضان احمد، آصف نظیر، محمد رستم عرف آندھا، فیاض عرف بھورا اور امجد عباسی شامل ہیں۔ سی ٹی ڈی کے تفتیشی افسر راجہ طارق نے کہا کہ 80 ہزار لیٹر تیل برآمد کیا گیا، جسے کروڈ آئل کہا جاتا ہے۔ 2 ٹرک برآمد کیئے گئے ہیں، مزید ریکوری کرنی ہے ۔ کروڈ آئل سے ڈیزل بنانے کی غیر قانونی ریفائنری بھی قبضے میں لے لی ہے ۔ پارکو کے ملازمین کے ملوث ہونے سے متعلق بھی تفتیش کی جارہی ہے ۔ عدالت نے ملزمان کے ریمانڈ میں 9 اپریل تک توسیع کردی۔ مفرور ملزمان میں مرکزی ملزم عالم، پارٹنر طاہر عرف فوجی، نواز، الیاس عرف پپو، ملزم کانسٹیبل علی حسن، سمیت 24 شامل ہیں۔ مقدمے کی تفتیش سی ٹی ڈی کے پاس ہے ، جبکہ مقدمہ کورنگی تھانے میں درج کیا گیا تھا۔
