کربلا کا میدان حق وباطل میں عظیم معرکہ تھا، سنی تحریک
کراچی(این این آئی)سربراہ پاکستان سنی تحریک شاداب رضا نقشبندی نے کہا ہے کہ سیدنا امام حسین نے دین اسلام کی بقا، حق وباطل کے فرق اورحق وانصاف کی سر بلندی کیلئے جو قربانی دی وتاریخ انسانیت میں بے مثال ہے۔
کربلا کا میدان حق وباطل کے درمیان ایک عظیم معرکہ تھا،ظالم وجابر اور عوام کے حقوق غصب کرنیوالوں کے خلاف ڈٹ جا نا حسینیت ہے ۔ان خیالات کا اظہار انہو ں نے مرکز اہلسنت سے جاری ایک بیان میں کیا۔شاداب رضا نقشبندی نے کہا کہ یزید ایک ظالم،فاسق وفاجر حکمران تھا جس نے خلافت کو بادشاہت میں بدل دیا تھا،ظالم وفاجر اور دین میں بگاڑ پیدا کرنیوالے یزید کے خلاف ڈٹ جانا ہی حسینیت ہے ، ظالم وجابر عوام کے حقوق غصب کرنیوالے حکمرانوں کے خلاف حق وصداقت کا پرچم بلند کیا جائے ۔انہوں نے کہا کہ فلسطین وکشمیر کے مظلوم مسلمان آزادی اور حقوق کیلئے سیدنا امام حسین کے نقش قدم پر گامزن ہیں،جب حق آتا ہے تو باطل مٹ جاتا ہے ،فلسطین و کشمیری مسلمانوں کی آزادی قریب ہے ،مسلم حکمرانوں کوفلسطینیوں و کشمیریوں کے حق میں آواز بلندکرنا ہوگی جو قومیں حق کیلئے آواز بلند نہیں کرتیں یا حق کا ساتھ نہیں دیتی ان کا شمار بھی یزیدکے ساتھ کیا جاتا ہے ،امام حسین کی قربانی ایمان کی صداقتوں کو سب سے بڑا خراج عقیدت ہے ،سیدنا امام حسین نے لازوال قربانی دے کر ظالموں سے ٹکرانے اور ڈکٹیٹروں پر چھاجانے کا حوصلہ عطا کیا۔اسلام کے خلاف انگلی اٹھانے والے دہشتگرد اوریزید کے پیروکار ہیں۔
