چیف سیکریٹری سے میئر کی ملاقات، انفرااسٹرکچر کی بحالی پر غور
کراچی (این این آئی)چیف سیکریٹری سندھ آصف حیدر شاہ سے میئر کراچی بیرسٹر مرتضی وہاب نے ہفتہ کوسندھ سیکریٹریٹ میں ملاقات کی، جس میں کراچی شہر کو درپیش مسائل اور ان کے حل کے لیے جاری اقدامات پر تفصیلی تبادلہ خیال کیا گیا۔
ملاقات میں واٹر بورڈ اور کراچی میٹروپولیٹن کارپوریشن (کے ایم سی)سے متعلق معاملات، بالخصوص شہر میں پینے کے پانی کی فراہمی، نکاسی آب کے نظام کی بہتری، اور انفرااسٹرکچر کی بحالی پر غور کیا گیا۔میئر کراچی مرتضی وہاب نے کہا کہ شہر میں پانی کی فراہمی کو یقینی بنانے کے لیے مربوط اقدامات جاری ہیں، اور مختلف علاقوں میں جاری منصوبوں کی رفتار میں تیزی لائی جا رہی ہے ۔ چیف سیکریٹری نے کہا کہ صوبائی حکومت کراچی میں پانی کی فراہمی اور انفرااسٹرکچر کی بحالی کے منصوبوں میں کے ایم سی کی بھرپور معاونت کر رہی ہے ۔ عوام کو بنیادی سہولیات کی فراہمی حکومت کی اولین ترجیح ہے۔
