جعلی فٹنس سرٹیفکیٹس والی گاڑیوں کے خلاف کارروائی کا آغاز
روٹ پرمٹس منسوخ، مقدمات درج اور 3دن میں رپورٹ پیش کرنے کی ہدایت عوام کی جان و مال سے کھیلنے کی کسی کو اجازت نہیں دی جائیگی،شرجیل انعام
کراچی(اسٹاف رپورٹر)حکومت سندھ کے محکمہ ٹرانسپورٹ و ماس ٹرانزٹ نے سندھ کے سینئر وزیرشرجیل انعام میمن کے احکامات کی روشنی میں جعلی فٹنس سرٹیفکیٹس استعمال کرنے والی گاڑیوں کے خلاف کارروائی شروع کر دی ہے ۔ سینئر وزیر شرجیل انعام میمن نے پی ٹی اے سیکریٹری کو جعلی فٹنس سرٹیفکیٹس استعمال کرنے والی تمام گاڑیوں کے روٹ پرمٹس منسوخ کرنے ، جعلی فٹنس سرٹیفکیٹس استعمال کرنے والی گاڑیوں کا ریکارڈ بھی محکمہ کی لائیو پورٹل پر اپڈیٹ کرنے ، قانون کی خلاف ورزی کرنے والوں کے خلاف مقدمات درج کروانے اور تین دن کے اندر کارروائی کی تفصیلی رپورٹ پیش کرنے کا حکم دے دیا ہے ۔ سندھ کے سینئر وزیر شرجیل انعام میمن نے کہا کہ بعض ٹرانسپورٹرز اپنی گاڑیوں کے فزیکل معائنے سے بچنے کے لیے ایجنٹس کے ذریعے جعلی فٹنس سرٹیفکیٹس حاصل کر رہے تھے ، جعلی فٹنس سرٹیفکیٹس صرف قوانین کی سنگین خلاف ورزی ہے بلکہ عوامی تحفظ کیلئے بھی بڑا خطرہ ہے ۔ انہوں نے کہا کہ عوام کی جان و مال سے کھیلنے کی کسی کو اجازت نہیں دی جائے گی، جعلی فٹنس سرٹیفکیٹس کا استعمال نہ صرف قانون شکنی ہے بلکہ ایک سنگین جرم بھی ہے ۔ ان کا مزید کہنا تھا کہ حکومت ٹرانسپورٹ نظام کو محفوظ، شفاف اور قانون کے مطابق بنانے کیلئے پرعزم ہے جو بھی اس غیر قانونی عمل میں ملوث پایا گیا، چاہے وہ ٹرانسپورٹر ہو یا ایجنٹ، اس کے خلاف بلا امتیاز کارروائی کی جائے گی۔
