گورنر سے جاپانی سفیر کی ملاقات ، باہمی امور پر تبادلہ خیال
لاہور(سپیشل رپورٹر)گورنر پنجاب محمد بلیغ الرحمن نے کہا پاکستان سیاحتی اعتبار سے پرامن ملک ہے ، جاپان اپنی ٹریول ایڈوائزری پر نظرثانی کرے ۔
گورنر پنجاب سے پاکستان میں تعینات جاپان کے سفیر نے ملاقات کی جس میں تجارت، سیاحت اور تعلیم کے شعبوں میں دو طرفہ تعاون کو بڑھانے پر تبادلہ خیال کیا گیا۔ گورنر پنجاب نے کہا پاکستانی ٹیکسٹائل انڈسٹری میں سپننگ ملز جاپانی ٹیکنالوجی استعمال کر رہی ہیں، جاپان میں مقیم پاکستانی اس کی معیشت کی ترقی میں مثبت کردار ادا کر رہے ہیں،جاپانی آٹو موبائلز کے اچھے معیار کی وجہ سے پاکستان میں مانگ ہے ، پاکستان اور جاپان کے درمیان تجارت کا حجم بڑھانے کی ضرورت ہے ،تعلیمی شعبے میں دونوں ممالک کے طلبہ کے وفود کے تبادلے ہونے چاہئیں، جاپان سے طلبہ یہاں آ کر یونیورسٹیوں میں تعلیم حاصل کریں۔ جاپانی سفیر نے کہا عوامی سطح پر رابطے بڑھانے کیلئے تعلیمی اور تجارتی وفود کے تبادلوں کی ضرورت ہے ۔ علاوہ ازیں یو ای ٹی کی سینیٹ کا 40 واں اجلاس چانسلر محمد بلیغ الرحمان کی زیر صدارت ہوا۔ اجلاس میں سینڈیکیٹ کی جانب سے توثیق شدہ مالی سال 24-2023 کے لئے ٹریثرر عمران بابرنے بجٹ پیش کیاجسے منظور کر لیا گیا۔ اجلاس میں انڈسٹری اکیڈمی تعلقات سمیت یونیورسٹی کے دیگر معاملات زیر بحث آئے ۔
