پنجاب بھر میں پولیس کا عیدالاضحی پر سکیورٹی پلان تشکیل
لاہور(سپیشل کرائم رپورٹر)لاہور سمیت پنجاب بھر میں عیدالاضحی کے موقع پر پولیس نے سکیورٹی پلان ترتیب دے دیا۔
آئی جی پنجاب ڈاکٹر عثمان انور کے مطابق مساجد، امام بارگاہوں اور نمازِ عید کے اجتماعات کے لیے سکیورٹی پلان تشکیل دیا گیا ہے جس کے تحت 26ہزار 500مساجد، امام بارگاہوں، 900کھلے عید کے اجتماعات پر 40ہزار اہلکار تعینات ہوں گے ۔لاہور میں نمازِ عید کے 5ہزار سے زائد اجتماعات کی سکیورٹی پر 6ہزار اہلکار تعینات ہوں گے جبکہ 498سپیشل پولیس، 260کیو آر ایف ٹیمیں بھی سکیورٹی پر تعینات ہوں گی۔ 227مویشی منڈیوں کی سکیورٹی کے فرائض 3ہزار اہلکار انجام دے رہے ہیں۔انہوں نے پولیس حکام کو ہدایت کی ہے کہ قربانی کی کھالیں اکٹھی کرنے کے حوالے سے محکمہ داخلہ کے ایس او پیز پر عمل درآمد کرایا جائے ۔ کالعدم تنظیموں اور فورتھ شیڈول میں شامل افراد کی نگرانی کا عمل مزید بنایا جائے ، مساجد اور امام بارگاہوں کی چھتوں پر سنائپرز اور سادہ لباس میں کمانڈوز کو تعینات کیا جائے ۔انہوں نے عید کی تعطیلات کے دوران پارکوں اور تفریحی مقامات کی سکیورٹی کے لیے اضافی نفری تعینات کرنے کا بھی حکم دیا۔
