محکمہ ریلوے کا عید پر چار سپیشل ٹرینیں چلانے کا فیصلہ
لاہور (اپنے کامرس رپورٹر سے ) عید پر مسافروں کا ممکنہ رش، محکمہ ریلوے کا عید پر چار سپیشل ٹرینیں چلانے کا فیصلہ ،عید سپیشل ٹرینیں 28 مارچ سے چلائی جائیں گی۔
عید الفطر پر پردیسیوں کی اپنے آبائی علاقوں میں جانے کی تیاریاں جاری، ریلوے انتظامیہ نے ممکنہ رش کے پیش نظر چار عید سپیشل ٹرینیں چلانے کا فیصلہ کرلیا ،ریلوے کی جانب سے 3 عید سپیشل ٹرینیں عید سے پہلے چلائی جائیں گی اور1 عید سپیشل تیسرے روز چلائی جائے گی،پہلی عید سپیشل لاہور سے کراچی کے درمیان چلائی جائے گی،دوسری عید سپیشل راولپنڈی سے کراچی کے درمیان چلے گی،تیسری عید سپیشل کوئٹہ سے پشاور کے درمیان چلائی جائے گی، چوتھی سپیشل ٹرین عید کے تیسرے روز کراچی سے لاہور کے لیے چلائی جائے گی۔مسافروں کا کہنا ہے کہ ہر پردیسی کی خواہش ہوتی ہے کہ عید کا تہوار اپنے پیاروں کے ساتھ گزارے مگر رش اس قدر ہوتا ہے کہ آبائی علاقوں میں جانا وبال جان بن جاتا ہے ، ریلوے کی جانب سے عید سپیشل چلانا خوش آئند ہے ، اس سے مسافروں کو ریلیف ملے گا ،ریلوے ذرائع کے مطابق عید پر رش کے پیش نظر پہلے سے چلنے والی ٹرینوں کے ساتھ اضافی کوچز بھی لگانے پر غور کیا جارہا ہے ۔
