ٹرین میں خاتون مسافر کو تھپڑ مارنے پر ٹکٹ چیکر معطل
لاہور (اپنے کامرس رپورٹر سے ) چلتی ٹرین میں خاتون مسافر کو تھپڑ مارنے کا معاملہ ،خاتون کو تھپڑ مارنے اور مسافروں سے لڑائی جھگڑا کرنے پر سپیشل ٹکٹ ایگزامینر ارشاد کو معطل کر دیا ہے۔
کراچی سے براستہ فیصل آباد راولپنڈی جانے والی پاکستان ایکسپریس میں ٹکٹ ایگزامینر کی جانب سے خاتون کو تھپڑ مارنے کی ویڈیو وائرل ہونے کے بعد ریلوے انتظامیہ نے سخت نوٹس لیتے ہوئے ٹکٹ ایگزامینر ارشاد کو معطل کردیا ، ڈویژنل کمرشل آفیسر ریلوے لاہور عبداللہ ارشد کے مطابق واقعہ کی انکوائری کا آغاز کردیا گیا ہے ، ذرائع کا کہنا ہے کہ پاکستان ایکسپریس ٹرین میں سامان راستے میں رکھنے پر لڑائی جھگڑا شروع ہوا ، مسافروں کی طرف سے تلخ کلامی کے بعد ویڈیوز بنانے پر بات بڑھ گئی، نوبت ہاتھا پائی تک پہنچ گئی ، دوران لڑائی ٹرین بھی رکی رہی ، دیگر مسافروں نے لڑائی جھگڑا ختم کرایا۔، مسافروں کی شکایات پر کارروائی شروع کر دی گئی ، انکوائری ٹیم کے سامنے ٹکٹ ایگزامینر ڈیوٹی موجود پولیس اہلکار اور گارڈ بھی پیش ہوں گے ۔
