مہنگائی مافیا کیخلاف کریک ڈاؤن،365گرانفروش گرفتار
لودھراں (سٹی رپورٹر)ڈپٹی کمشنر ڈاکٹر لبنیٰ نذیر کی سربراہی میں مہنگائی مافیا کے خلاف بھرپور کریک ڈاؤن جاری ہے ۔
رواں ماہ کے دوران پرائس کنٹرول ایکٹ کی خلاف ورزی کے مرتکب 365 گراں فروشوں کو حراست میں لیا گیا ہے ۔ ضلعی پرائس کنٹرول مجسٹریٹس نے چھاپے مارکر گراں فروشوں کو 1 لاکھ 49 ہزار کے جرمانے عائد کیے ہیں ۔ پرائس کنٹرول مجسٹریٹس نے 57 ہزار سے زائد چھاپے مار کر 67 گراں فروشوں کو جرمانے عائد کیے ہیں ۔ مہنگائی مافیا کے خلاف آپریشن کے دوران پرائس کنٹرول مجسٹریٹس نے 28 ہزار سے زائد بے قاعدگیاں ریکارڈ کیں ہیں ۔ ڈپٹی کمشنر ڈاکٹر لبنیٰ نذیر نے کہا ہے کہ مصنوعی مہنگائی کی کسی صورت اجازت نہیں ہے ۔انہوں نے کہا کہ منڈیوں سے طلب و رسد پر کڑی نظر رکھی جا رہی ہے ۔ ڈپٹی کمشنر نے مزید کہا ہے کہ عام مارکیٹ میں عوام کو مقررہ نرخوں پر اشیاء خوردونوش کی فراہمی کیلئے ٹھوس اقدامات کیے جا رہے ہیں ۔ ڈپٹی کمشنر ڈاکٹر لبنیٰ نذیر نے سبزی و فروٹ ایسوسی ایشن ، چکن مٹن ایسوسی ایشن اور دودھ دہی ایسوسی ایشن کے عہدیداروں سے خصوصی ملاقات کے دوران اشیاء کی قیمتوں میں استحکام کی ہدایات کی ہیں ۔
