ڈی سی کمپلیکس میں یوم پاکستان کی سادہ مگر پروقار تقریب
سرگودھا(سٹاف رپورٹر)ضلعی انتظامیہ کے زیر اہتمام یوم پاکستان کی سادہ مگر پروقار تقریب ڈی سی کمپلیکس میں منعقد ہوئی۔ڈپٹی کمشنر کیپٹن ریٹائرڈ محمد وسیم نے ڈی پی او محمد صہیب اشرف کے ہمراہ قومی پرچم لہرایا۔۔۔
پولیس کے چاک و چوبند دستے نے پرچم کوسلامی پیش کی، جبکہ پولیس بینڈ نے قومی ترانہ اور ملی نغموں کی دھنیں پیش کی۔ تقریب میں اے ڈی سی جی عمر فاروق، سی ای او ایجوکیشن کلثوم منشاء اور پروفیسر ڈاکٹر ہارون الرشید تبسم کے علاوہ سرکاری افسران، بوائز اسکاؤٹس سمیت دیگرشعبہ زندگی کے افراد نے شرکت کر کے ملک کی خدمت اور وفاداری کا پیغام دیا۔ڈپٹی کمشنر سرگودہا کیپٹن (ر) محمد وسیم نے اپنے پیغام میں کہا کہ 23 مارچ تجدید عہد کا دن ہے کہ ہم مملکت پاکستان کو اسلامی فلاحی ریاست بنانے کیلئے تحریک پاکستان کے جذبے کو اجاگر کریں۔ایثار وقربانی ،حب الوطنی ’ احساس ذمہ داری اورملت واحدہ کے فروغ کیلئے اپنے عہدوں او رمراتب کو استعمال کریں۔ انہوں نے کہا کہ 23 مارچ تحریک پاکستان میں سنگ میل کی حیثیت رکھتاہے جب برصغیر پاک وہند کے محکوم مسلمانوں نے قائد اعظم محمد علی جناح کی قیادت میں اپنی منزل کا تعین کیااورسات سال کے قلیل عرصہ میں متحد جدوجہد کے نتیجہ میں پاکستان کا حصول ممکن ہوا۔انہوں نے کہاکہ آزادی بہت بڑی نعمت ہے ا س کی قدر کریں۔اپنی صفوں میں اتحاد،محبت اور رواداری کو پروان چڑھائیں۔ منفی سوچ کو رد کریں تاکہ ہم اقوام عالم میں اپنی شناخت منوا سکیں۔ اس موقع پر اے ڈی سی جی عمر فاروق نے ملک و قوم کی سلامتی کی دعا بھی کروائی۔
