اردو، سندھی ڈراموں کے نامور اداکار گلاب چانڈیو کو مداحوں سے بچھڑے 7 برس بیت گئے
لاہور: (دنیا نیوز) اپنے لاجواب کردار سے شائقین کے ذہنوں میں گھر کرنے والے اردو اور سندھی ڈراموں کے نامور اداکار گلاب چانڈیو کو مداحوں سے بچھڑے 7 برس بیت گئے۔
اپنی شاندار اداکاری سے ڈراموں میں جان ڈالنے والے گلاب چانڈیو خداداد صلاحیتوں کے مالک تھے، فن کی دنیا کے اس گلاب نے ٹی وی، فلم اور سٹیج پر برسوں راج کیا، انہیں مکالمات کی ادائیگی میں کمال حاصل تھا۔
بیشتر ڈراموں میں منفی کردار ادا کرنے والے گلاب چانڈیو حقیقی زندگی میں نرم مزاج اور سادہ طبیعت انسان تھے، ان کے مقبول ڈراموں میں سچائیاں، بے وفائیاں، ماروی، غلام گردش، ساگر کا موتی، جنگل، زینت، ٹیپو سلطان، نوری جام تماچی، اور چاند گرہن سمیت متعدد ڈرامے شامل ہیں۔
سندھی اور اردو ڈراموں سے شہرت پانے والے فنکار گلاب چانڈیو نے فلمی شائقین کو بھی مایوس نہیں کیا، انہوں نے سندھی، اردو اور پنجابی کی 18 فلموں میں اداکاری کے جوہر دکھائے جن میں سوہنا سائیں، دشمن، طوفان، الزام، راز، سرگم، اور میری توبہ سمیت دیگر کئی قابل ذکر ہیں۔
گلاب چانڈیو کی فنی خدمات کے اعتراف میں حکومت پاکستان نے انہیں 14 اگست 2015ء کو صدارتی تمغہ برائے حسن کارکردگی دیا، وہ 18 جنوری 2019ء کو کراچی میں انتقال کر گئے تھے لیکن منفرد اداکاری کے باعث انہیں ہمیشہ یاد رکھا جائے گا۔
