رمضان کا پہلا عشرہ ، مسجد الحرام میں اڑھائی کروڑ زائرین کی آمد کا نیا ریکارڈ قائم
مکہ مکرمہ: (ویب ڈیسک) رمضان المبارک کے پہلے عشرے میں مسجدالحرام میں زائرین کی آمد کا نیا ریکارڈ قائم ہو گیا۔
حرمین شریفین کے امور کی جنرل اتھارٹی کی جانب سے بتایا گیا ہے کہ ماہ صیام کے ابتدائی 10 ایام میں مسجد الحرام میں عبادت اور زیارت کیلئے آنیوالوں کی تعداد دو کروڑ 50 لاکھ سے تجاوز کر گئی جو ایک منفرد ریکارڈ ہے۔
اتھارٹی کے مطابق اسی عرصے کے دوران 55 لاکھ سے زائد مسلمانوں نے عمرہ ادا کیا جو مقدس مقام پر مذہبی سرگرمیوں میں نمایاں اضافے کی نشاندہی کرتا ہے۔
عرب میڈیا رپورٹ کے مطابق زائرین کی بڑھتی ہوئی تعداد کو منظم کرنے کیلئے وسیع پیمانے پر انتظامات کیے گئے ہیں، 11 ہزار سے زائد ملازمین کو مسجدالحرام کے صحن اور گزرگاہوں میں عبادت گزاروں کی رہنمائی کیلئے تعینات کیا گیا ہے۔
علاوہ ازیں 350 سعودی نگران چار ہزار صفائی کارکنوں کی نگرانی کر رہے ہیں، زائرین کی سہولت کیلئے مسجد الحرام میں زمزم کے 20 ہزار ڈسپنسر فراہم کیے گئے ہیں۔
