محسن نقوی اور طلال چودھری سے مفتی منیب کی ملاقات، مسائل حل کرنے کی یقین دہانی
اسلام آباد: (دنیا نیوز) وفاقی وزیر داخلہ محسن نقوی اور وزیر مملکت طلال چودھری سے مفتی اعظم پاکستان مفتی منیب الرحمان کی سربراہی میں وفد نے ملاقات کی۔
وزیر داخلہ محسن نقوی نے ملک میں قیام امن اور استحکام کیلئے مفتی منیب اور دیگر علمائے کرام کی خدمات کو خراج تحسین پیش کیا، محسن نقوی نے وفد کو ان کے مسائل حل کرنے کی یقین دہانی کرائی۔
ملاقات میں اتفاق کیا گیا کہ مسائل کے حل کا جائزہ لیا جائے گا اور حل کے لئے اقدامات کئے جائیں گے۔
وزیر مملکت داخلہ طلال چودھری کی سربراہی میں کمیٹی تشکیل دی گئی، مفتی منیب الرحمن اور دیگر علما گرام بھی اس کمیٹی کا حصہ ہوں گے، کمیٹی مسائل کے حل کیلئے قابل عمل حل کیلئے سفارشات پیش کرے گی۔
وفاقی وزیر داخلہ محسن نقوی کا کہنا تھا کہ مفتی منیب الرحمن سب کے لئے قابل احترام ہیں اور ہمیشہ اتحاد، اتفاق اور یکجہتی کی بات کرتے ہیں، مفتی منیب الرحمن سب کو متحد رکھنے کا کردار ادا کرتے ہیں، ہم سب ایک ہیں اور پاکستان سب سے پہلے ہے۔
طلال چودھری نے کہا کہ علمائے کرام کی پاکستان کے لئے خدمات قابل ستائش ہیں۔
اس موقع پر مفتی منیب الرحمن نے ملک کی سالمیت، ترقی، استحکام اور خوشحالی کے لئے خصوصی دعا کی۔
وفد میں علامہ لیاقت حسین اظہری، مفتی عابد مبارک المدنی اور ملک محمد ابراہیم شامل تھے، وفاقی سیکرٹری داخلہ محمد خرم آغا، آئی جی اسلام آباد علی ناصر رضوی اور دیگر حکام بھی اس موقع پر موجود تھے۔
