مصر: عسکریت پسندوں کے ساتھ جھڑپیں, 55 فوجی ہلاک
فائرنگ کے تبادلے میں چند حملہ آور ہلاک،مرنے والوں میں 20افسران شامل،وزارت داخلہ ، حصم گروپ نے ذمہ داری قبول کرلی
قاہرہ(دنیا مانیٹرنگ،آئی این پی)مصر میں عسکریت پسندوں کے ساتھ جھڑپ میں 55مصری سکیورٹی اہلکار ہلاک ہوگئے ، ان میں 20افسران بھی شامل ہیں، ہلاکتوں میں اضافے کا خدشہ ہے ۔ غیر ملکی میڈیا کی رپورٹس کے مطابق مصری حکام کا کہنا ہے کہ گزشتہ روز کے حملے اوراس کے بعد شروع ہونے والی جھڑپ میں 55 سکیورٹی اہلکار مارے گئے ۔ ان میں 20 افسران بھی شامل ہیں۔ ہلاکتوں میں اضافے کا خدشہ ظاہر کیا گیا ہے ۔ یہ جھڑپ مغربی صحرائی علاقے میں واقع نخلستانی مقام بہاریہ کی جانب جانے والی سڑک پر ہوئی۔ سکیورٹی اہلکار عسکریت پسندوں کے ٹھکانوں کی تلاش میں تھے کہ ان پر حملہ ہوگیا۔ مصری سکیورٹی اہلکاروں کے قافلے کو سب سے پہلے راکٹ سے نشانہ بنایا گیا۔ مصری وزارت داخلہ نے ہلاکتوں کی تصدیق کرتے ہوئے کہا ہے کہ جھڑپوں میں چند حملہ آور بھی مارے گئے ہیں۔ ایک انتہائی غیر معروف گروپ حصم نے حملے کی ذمہ داری قبول کی ہے لیکن میڈیا اسے جھوٹ قرار دے رہا ہے ۔
