باجوہ،فیض اور 4جج قومی مجرم:نواز شریف:21اکتوبر کو ہی واپسی:شہباز شریف
لندن (دنیا نیوز،مانیٹرنگ ڈیسک)مسلم لیگ (ن)کے قائد اور سابق وزیراعظم نواز شریف نے کہا ہے کہ جنرل(ر)قمر جاوید باجوہ، لیفٹیننٹ جنرل (ر)فیض حمید اور۔۔۔
سابق چیف جسٹس ثاقب نثار، آصف سعید کھوسہ ،عظمت سعید سمیت 4جج قومی مجرم ہیں۔لندن میں مسلم لیگ ن کے اجلاس میں نواز شریف اور شہباز شریف نے پارٹی رہنماؤں سے سیاسی صورت حال پر گفتگو کی ۔ اس موقع پر سابق وزیر خزانہ اسحاق ڈار اور مریم نواز بھی موجود تھیں۔شرکا سے گفتگو میں قائد مسلم لیگ (ن)نواز شریف نے کہا کہ 2017کے ہنستے بستے پاکستان کو ایک سازش کے تحت بربادی کے دہانے پر لا کھڑا کیا گیا اور کھلنڈروں کے ٹولے کو پاکستان پر مسلط کیا گیا۔نواز شریف کا مزید کہنا تھا کہ جب تک اس سازش میں شامل تمام کرداروں کو کیفر کردار تک نہیں پہنچایا جائے گا، پاکستان آگے نہیں بڑھ سکے گا۔اجلاس سے قبل میڈیا سے گفتگو کرتے ہوئے سابق وزیراعظم شہباز شریف نے کہا کہ نواز شریف کی وطن واپسی کی تاریخ میں کوئی تبدیلی نہیں ہوئی،21اکتوبر کو ہی واپسی ہوگی، نواز شریف نے لندن آنے کا حکم دیا اور چلا آیا، نواز شریف نے مشورے کیلئے بلایا ہے ۔
شہباز شریف نے کہا کہ نواز شریف کی واپسی پر پروپیگنڈا کرنے والوں کو جلد جواب دیا جائے گا ، گوجرانوالہ میں کوئی ملاقات نہیں ہوئی نہ گوجرانوالہ گئے ہیں ۔ مسلم لیگ (ن) کی سینئر نائب صدرمریم نواز نے کہا میاں نواز شریف کے استقبال کیلئے بڑی تیاریاں جاری ہیں، میاں صاحب کا مورال بہت اچھا ہے وہ اپنے ملک میں رہنا چاہتے ہیں، میاں صاحب سے ملاقات کرکے اچھا لگا، میاں صاحب وطن جانے پر بہت خوش ہیں،نواز شریف کی واپسی کی تیاریاں زور و شور سے جاری ہیں، افواہوں پر زیادہ توجہ نہیں دیتی، افواہیں جلد دم توڑ جائیں گی، 40 سالہ سیاسی جدوجہد میں 11 سال میاں صاحب کی جلا وطنی میں گزرے ہیں۔
