ٹرمپ مذہب کے باعث مجھ پر تنقید کرتے رہے :میئر لندن
لندن(اے ایف پی)لندن کے میئر صادق خان نے ٹرمپ پر الزام لگایا ہے کہ وہ نسل اور مسلم عقیدے کی وجہ سے مجھ پر بار بار تنقید کرتے رہے ۔
انہوں نے ایک پوڈ کاسٹ پر بات کرتے ہوئے کہا ماضی میں ٹرمپ نے ان پر ناقابل یقین حد تک ذاتی حملے کئے ،انہوں نے کہا اگر میر ی جلد اس رنگ کی نہ ہوتی اور اگر میں ایک باعمل مسلمان نہ ہوتا تو وہ میرے خلاف ایسی باتیں نہ کرتے ۔یاد رہے ٹرمپ کی پہلی صدارت کے دوران دونوں نے ایک دوسرے کو شدید تنقید کا نشانہ بنایا تھا ،ایک موقع پر ٹرمپ نے صادق خان پر دہشتگردی کیخلاف بہت برا کام کرنیکا الزام لگایا اور انہیں گونگا بھی کہا،میڈیا رپورٹس کے مطابق صادق خان کے انٹرویو کے بعد منتخب امریکی صدر کے ساتھ ان کاطویل عرصے سے جاری لفظی جھگڑا پھر شروع ہو سکتا ہے ۔واضح رہے یہ پوڈ کاسٹ امریکی صدارتی انتخابات میں ٹرمپ کی کامیابی سے پہلے ریکارڈ کیا گیا ہے ۔
