بانی پی ٹی آئی کو صحت سہولتیں ملنی چاہئیں :آصفہ بھٹو
دبئی (آئی این پی )پیپلزپارٹی کی رکن قومی اسمبلی آصفہ بھٹو زرداری نے بانی پی ٹی آئی عمران خان کی زندگی کو خطرات کے حوالے سے کہا ہے کہ علاج کے لئے مکمل منصفانہ اور جائز سہولتیں ملنی چاہئیں۔
موجودہ سیاسی بحران کے سلسلے میں غیر ملکی میڈیا کو دیئے گئے ایک انٹرویو میں آصفہ نے کہا عمران خان کی زندگی کو درپیش خطرات کو نظر انداز نہیں کیا جانا چاہئے ، کوئی بھی شخص جو یہ کہتا ہے کہ اس کی زندگی کو خطرہ ہے تو ہمیں اس کے تحفظ کے لئے ضروری چیزوں کا سنجیدگی سے اہتمام کرنا چاہئے ۔ ایک سوال کے جواب میں کہا بلاشبہ عمران خان جیل میں ہیں لیکن ان کے لئے قانون اور عدالت کے تمام راستے کھلے ہیں، وہ عدالتوں سے رجوع کر سکتے ہیں اور عدالتوں کے سامنے اپنا مقدمہ پیش کر سکتے ہیں۔انہوں نے مزیدکہا ہمارا خاندان بھی اگرچہ بار بار اقتدار میں آیا ہے ، اس کے باوجود خاندان کے کئی افراد کو سیاسی وجوہ کی بنیاد پر مشکلات کا سامنا کرنا پڑا ہے حتیٰ کہ جیلیں اور پھانسی بھی برداشت کرنا پڑی، اس لیے وہ اس معاملے کی سنگینی کو زیادہ شدت سے محسوس کر سکتی ہیں۔ میرے نانا کو ایک آمر نے ایک ایسے جرم میں پھانسی کی سزا دی جو انہوں نے کیا ہی نہیں تھا۔
