2 سالوں میں پاکستان کا ریونیو دگنا ہوگیا :آئی ایم ایف
نیویارک،اسلام آباد (دنیا نیوز ،این این آئی) آئی ایم ایف نے کہا ہے کہ گزشتہ 2 سالوں میں پاکستان کا ریونیو تقریباً دگنا ہو گیا ہے ۔آئی ایم ایف حکام کے مطابق پاکستان کا ریونیو 9.6 ٹریلین روپے سے بڑھ کر18 ٹریلین روپے ہو گیا ہے ۔
وزارت خزانہ نے اس حوالے سے کہا کہ ریونیو میں اضافہ ٹیکس وصولیوں، نئے ٹیکس اور مرکزی بینک کی مدد سے ممکن ہوا۔ دوسری طرف آئی ایم ایف کی سٹاف رپورٹ کے مطابق رواں سال پاکستانی تارکین وطن کی ترسیلاتِ زر ہدف سے زائد رہیں گی تاہم آئندہ مالی سال میں ترسیلاتِ زر کا حجم رواں مالی سال سے کم رہے گا۔ رواں مالی سال ترسیلات زر پاکستان کی تاریخ میں پہلی بار کسی بھی مالی سال کے دوران سب سے زیادہ رہیں ، تاہم رواں مالی سال کے مقابلے میں آئندہ مالی سال اس میں کمی آئے گی، اس کے بعد ہر مالی سال ترسیلات زر میں بتدریج اضافہ ہوگا اور مالی سال 2029۔30 تک ترسیلات زر بڑھ کر38 ارب48 کروڑ 70 لاکھ ڈالرز پر پہنچ جائیں گی۔آئندہ مالی سال ترسیلات زر 35 ارب 76 کروڑ 10 لاکھ ڈالرز اور رواں مالی سال ترسیلات زر 36 ارب 20کروڑ 10لاکھ ڈالرز رہنے کا تخمینہ ہے ۔رواں مالی سال کے لیے ترسیلات زرکاحکومتی مقررہ ہدف30 ارب27کروڑ 80 لاکھ ڈالرز ہے جبکہ گزشتہ مالی سال ترسیلات زر کاحجم 30 ارب25 کروڑ 10 لاکھ ڈالرز رہا تھا۔
