اسحاق ڈار استنبول پہنچ گئے او آئی سی وزرائے خارجہ اجلاس میں پاکستان کی نمائندگی کرینگے
استنبول (نیوز ایجنسیاں )نائب وزیراعظم اور وزیر خارجہ اسحاق ڈار ترکیے کے شہر استنبول پہنچ گئے جہاں وہ اسلامی تعاون تنظیم (او آئی سی)کے وزرائے خارجہ کے دو روزہ اجلاس میں پاکستان کی نمائندگی کریں گے ۔
استنبول ایئرپورٹ پر اسحاق ڈار کا استقبال پاکستان کے قونصل جنرل فواد شیر اور سینئر سفارتی افسر جنید یوسف نے کیا۔او آئی سی وزرائے خارجہ اجلاس کا آغاز آج ہفتہ سے ہو رہا ہے جس میں مسلم دنیا کو درپیش اہم معاملات زیر بحث آئیں گے ۔ خصوصی سیشن ایران پر اسرائیلی جارحیت کے خلاف بھی ہوگا جس میں رکن ممالک کا مشترکہ موقف تشکیل دینے پر غور ہوگا۔ صدر رجب طیب اردوان افتتاحی سیشن سے خطاب کریں گے ۔کل اتوار کو مقبوضہ کشمیر کی صورتحال پر او آئی سی رابطہ گروپ کا علیحدہ اجلاس بھی کیا جائے گا جس میں کشمیری عوام کی حمایت اور بھارتی مظالم کے خلاف مشترکہ حکمت عملی پر مشاورت کی جائے گی۔
