گھٹیا ترین کھانا ملتا ہے ، ایک اور بھارتی اہلکا ر نے فوج کا بھانڈا پھوڑ دیا
جو منہ کھولتا ہے ، مارا جاتا ہے ،کب تک برداشت کریں،آپس میں لڑنا پڑتا ہے ،جوگی داس بدسلوکی پر وزیراعظم ،وزیردفاع کو ایک سال خط لکھے ،شنوائی کے بجائے اردلی بنادیا،وڈیو پیغام
نئی دہلی(دنیاڈیسک) بھارتی فوج میں شرمناک سہائک (اردلی) نظام اور سپاہیوں کے ساتھ افسروں کے غیر انسانی سلوک کے خلاف ایک اور بھارتی جوان اور آرمی میڈیکل کور کے سپاہی سندھاو جوگی داس کی وڈیو سوشل میڈیا پر وائرل ہوگئی۔ ویٹرن جوان نامی فیس بک پیج پر پوسٹ کی جانے والی اس وڈیو میں جوگی داس کا کہنا ہے کہ سب سے زیادہ دفاعی بجٹ رکھنے والی بھارتی فوج کی شان صرف دکھاوا ہے ، کچھ افسران نے جوانوں کو غلام بنا رکھا ہے ، جوانوں کو سب سے گھٹیا کھانا دیا جاتا ہے اور کھانا بھی دیا جاتا ہے تو زندہ رہنے کیلئے ، ضرورت کے لیے نہیں، فوج میں بہت کچھ غلط ہو رہا ہے ، ہمیں فوج کے اندر آپس میں لڑنا پڑتا ہے ، کب تک برداشت کرتے رہیں گے ، جو منہ کھولتا ہے ، مارا جاتا ہے ۔وڈیو میں جوگی داس کا کہنا تھا کہ اس نے بھارتی وزیراعظم اور وزیرِ دفاع کو سپاہیوں کے ساتھ ہونے والی بدسلوکی سے متعلق ایک سال تک خط لکھے ، لیکن اس کی شنوائی نہیں ہوئی بلکہ فوجی ڈسپلن کی خلاف ورزی پر اسے سہائک کی شرم ناک ڈیوٹی پر لگادیا گیا جبکہ اس پورے عرصے میں اسے مسلسل ہراساں بھی کیا جاتا رہا۔ واضح رہے کہ اس سے پہلے بھی کئی سپاہیوں نے اپنے افسران کے رویے اور انہیں ملنے والی خوراک پر شدید تحفظات کا اظہار کیا تھا، اس کے نتیجے میں فوج کے اعلیٰ ترین حکام نے تو کوئی کارروائی نہیں کی تاہم اس معاملے سے پردہ اٹھانے والے ایک اہلکار کو ضرور قتل کردیا گیا۔
