رواں برس عازمین حج کو آب زم زم مفت نہیں ملے گا
اسلام آباد( آن لائن )عازمین حج کو آب زم زم مفت نہیں قیمتاً ملے گا ، پاکستانی عازمین حج کو رواں برس 20 کروڑ روپے ادا کرنے ہوں گے۔ آب زمزم کے حصول کیلئے سعودی عرب کو رقم ڈالرز میں ادا کی جائے گی۔
ذرائع وزارت مذہبی امور کے مطابق عازمین کچھ عرصہ قبل تک مفت اور مقدار کی شرط کے بغیر آب زم زم لا سکتے تھے ،اب اجازت نہیں۔ ہر حاجی کو پاکستان واپس پہنچنے پر صرف پانچ لٹر آب زم زم ملے گا۔آب زم زم کیلئے فی کس 1114 روپے ادا کرنے ہوں گے جو 15 سعودی ریال بنتے ہیں۔ پاکستانی حاجیوں کو 8لاکھ،96ہزار لٹر آب زم زم فراہم کیا جائے گا۔ذرائع وزارت مذہبی امور کے مطابق ایک لاکھ 79 ہزار 210 عازمین سے آب زم زم کی قیمت حج اخراجات میں پیشگی وصول کی جارہی ہے جو 19کروڑ 96لاکھ روپے بنتے ہیں۔ سعودی حکام کا موقف ہے کہ آب زم زم غیر محفوظ بوتلوں میں بھرنے سے فضائی سفر میں مشکلات درپیش ہوتی ہیں۔
