مئی اور جون میں کچھ نہ کچھ بہتر فیصلے ہونگے:وزیراعلیٰ خیبرپختونخوا
اسلام آباد(دنیا نیوز،مانیٹرنگ ڈیسک)وزیر اعلیٰ خیبرپختونخوا علی امین گنڈا پور نے کہا کہ مئی اور جون کا مہینہ اچھا ہوگا اور کچھ نہ کچھ بہتر فیصلے ہوں گے ،صوبے کی نمائندگی کرنے آئے تھے ، صوبے کے شیئر پر سمجھوتا نہیں کریں گے ، وفاق خیرپختونخوا کے فنڈز فوری جاری کرے ۔
سرمایہ کاری سہولت کونسل کے اجلاس میں شرکت کے بعد میڈیا سے گفتگو کرتے ہوئے وزیراعلیٰ علی امین گنڈاپور نے کہا کہ وسائل کو بروئے کار لا کر فائدہ حاصل کیا جائے ، ایس آئی ایف سی کے ذریعے سرمایہ کاری کا خیرمقدم کریں گے ، کان کنی میں اصلاحات کر کے ریونیو بڑھا سکتے ہیں۔علی امین گنڈاپور کا کہنا تھا کہ ہم نے کہا ضم اضلاع میں ٹیکس اس بجٹ میں عائد نہ کیا جائے ، ایس آئی ایف سی اجلاس میں فاٹا اور پاٹا پر ٹیکس لگانے کی مخالفت کی ہے ۔وزیراعلیٰ خیبرپختونخوا نے کہا کہ ہمارے واجبات ادا نہیں کیے جاتے تو یہ زیادتی ہے ، وفاق سے مطالبہ ہے کہ ہمارے صوبے کے فنڈز فوری ادا کریں، خیبرپختونخوا کے عوام کو ریلیف دینے کیلئے ہر حد تک جاؤں گا۔انہوں نے کہا کہ صوبے کے بجٹ کا حجم 11 ہزار ارب کی بنیاد پر رکھا ہے ، وفاق کی جانب سے زیادہ فنڈز آتے ہیں تو عوام کو مزید ریلیف دیں گے ، عوام نے اس لیے مینڈیٹ دیا کہ ان کے حقوق کی جنگ لڑیں۔علی امین گنڈا پور نے کہا کہ آرمی چیف سے دوبار ملاقات ہوئی ہے ، جو بات کرنی ہے اس کا ماحول نہیں تھا۔
