ٹرک نے نویں جماعت کے 2بھائیوں ،دوست کی جان لے لی:قصور :حادثے میں 2جاں بحق
اسلام آباد،راہوالی،قصور(نمائندہ دنیا،دنیا نیوز،اے پی پی )موٹر وے پرکلر کہار ،راہوالی گوجرانوالہ قصور کے قریب ٹریفک حادثات میں دو بھائیوں سمیت 7افرادجاں بحق ہوگئے ۔
موٹر وے ایم ٹو کلر کہار کے قریب رات گئے حادثہ کار ڈرائیور کی غفلت سے پیش آیا۔ پیچھے سے آنے والی کارٹرالرسے ٹکرا نے سے دو افراد جاں بحق اور ایک زخمی ہو گیا۔ اطلاع پاتے ہی موٹروے پولیس موقع پر پہنچ گئی ،امدادی کارروائیاں کرکے لاشوں اور زخمی کو ٹراما سینٹر کلر کہار منتقل کر دیا ۔ راہوالی میں ڈی سی کالونی کے قریب تیز رفتار ٹرک نے موٹر سائیکل سواروں کو کچل دیا،حادثے میں تینوں نوجوان پندرہ برس کا معیز ، اسکابھائی عمیر اوردوست زوہیب موقع پر ہی زندگی ہارگئے ، وہ نویں جماعت کے طالبعلم تھے ،ریسکیو ٹیموں نے لاشوں کو سول ہسپتال منتقل کردیا جبکہ حادثے کا سبب بننے والا ٹرک ڈرائیور فرار ہوگیا۔کھارا چونگی قصور میں تیز رفتار کوچ کی ٹکر سے موٹرسائیکل سوار 2 افراد موقع پر دم توڑ گئے ،شناخت نہ ہوسکی۔ریسکیو حکام کے مطابق حادثہ دھند پرپیش آیا، لاشیں ہسپتال منتقل کر دی گئیں۔
