کچہ ماچھکہ رحیم یار خان: مقابلے میں اندھڑ گینگ کا ڈاکو ہلاک
لاہور (کرائم رپورٹر )پنجاب پولیس کی کچہ کے کریمنلز کیخلاف 2025 کی پہلی بڑی کامیابی،کچہ ماچھکہ رحیم یار خان پولیس مقابلہ میں اندھڑ گینگ کا ڈاکو ہلاک، کلاشنکوف سینکڑوں گولیاں برآمد کرلی گئیں ۔
ہلاک ڈاکو سب انسپکٹر رمضان سمیت 12 پولیس اہلکاروں کی شہادت میں ملوث تھا جسکی شناخت میر حسن عرف بگا چانڈیا کے نام سے ہوئی،پولیس پر فائرنگ، اغوا برائے تاوان، قتل ، ڈکیتی جیسے متعدد سنگین مقدمات میں ریکارڈ یافتہ تھا۔ ماچھکہ پولیس نے تنویر اندھڑ گینگ کی علاقے میں بڑی واردات کی خفیہ اطلاع پر سوترکی بچاؤ بند پر ناکہ بندی کر رکھی تھی۔ ڈاکوؤں نے پولیس کو دیکھتے ہی اندھا دھند فائرنگ کر دی۔ جوابی کارروائی میں ایک ڈاکو مار ا گیا، دیگر ساتھی فرار ہوگئے ۔ حملے میں پولیس اہلکار محفوظ رہے ، گاڑی کو جزوی نقصان پہنچا۔ پولیس آپریشن میں ڈی ایس پی بھونگ، سرکل کے تمام ایس ایچ اوز،ایلیٹ ٹیموں ، درجنوں اہلکاروں نے حصہ لیا۔ پولیس کو بکتر بند گاڑیوں، بھاری ہتھیاروں کی مدد بھی حاصل تھی۔
