آسان کاروبار سکیم منظور،3کروڑ تک بلاسود قرض ،مفت زمین بھی دینگے:مریم نواز

آسان کاروبار سکیم منظور،3کروڑ تک بلاسود قرض ،مفت زمین بھی دینگے:مریم نواز

لاہور(اے پی پی ،دنیا نیوز) وزیراعلیٰ پنجاب مریم نوازشریف کی زیر صدارت صوبائی کابینہ کا22 واں اجلاس ہوا۔ اجلاس میں ریکارڈ 91 ایجنڈا پوائنٹ زیر بحث لائے گئے ۔ صوبائی کابینہ نے پہلے پنجاب ہندو میرج ایکٹ،رجسٹریشن رولز 2024 کی منظوری دے دی۔

 وزیر اعلیٰ نے کاٹن کی پیداوار بڑھانے کے لئے ہنگامی اقدامات کی ہدایت کی اور موسمیاتی تبدیلیوں کی وجہ سے گنے کی پیداوار میں کمی کے ازالے کے لئے اقدامات کا حکم دیا۔ اجلاس میں پنجاب میں اپنی نوعیت کی پہلی پنجاب آسان کاروبار فنانس سکیم اور سی ایم پنجاب آسان کاروبار کارڈ کی منظوری دی گئی،آسان کاروبار کے لئے 3کروڑ روپے تک بلا سود قرضے دینے کا فیصلہ کیا گیا۔ وزیر اعلیٰ مریم نواز نے اعلان کیا آسان کاروبار سکیم کے لئے مفت اراضی بھی دینگے ۔ کابینہ نے پنجاب بھر میں تمام وہیکلزکی رجسٹریشن مہم شروع کرنے اور پنجاب میں موٹر سائیکل کی سپیڈ کو 60کلو میٹر فی گھنٹہ تک محدود کرنے کا فیصلہ کیا ۔ 12ماہ کے بعدموٹر سائیکل کی انسپکشن اور سرٹیفکیشن کے لئے ترمیم کی بھی منظوری دی گئی ۔ وزیر اعلیٰ نے ایک لاکھ بزنس سٹارٹ اپ کا ہدف بھی مقرر کر دیا اور سٹارٹ اپ کے لئے بزنس پلان دینے کی ہدایت کی۔ انہوں نے پنجاب بھر میں ای وہیکلز کے لئے چارجنگ سٹیشن قائم کرنے کا بھی حکم دیا اور جامع الیکٹرک وہیکلز پالیسی طلب کر لی۔کابینہ نے قذافی سٹیڈیم کا نام تبدیل کرنے کا فیصلہ مسترد کردیا۔ وزیر اعلیٰ اور صوبائی کابینہ نے ہونہار سکالر شپ کی کامیاب لانچنگ پر صوبائی وزیر ایجوکیشن رانا سکندر حیات کو شاباش دی۔

مریم نواز نے کہا ہونہار سکالر شپ پر طلبہ کا رسپانس بہترین اور قابل تحسین ہے ۔ میرٹ پر آنے والے ہر طالب علم کو لیپ ٹاپ دینا چاہتی ہوں۔ وزیر اعلیٰ نے لیپ ٹاپ کی تعداد 40ہزار سے بڑھانے اورسیکنڈ ایئر اور تھرڈ ایئر کے طلبہ کو بھی ہونہار سکالر شپ دینے کے لئے فوری اقدامات کی ہدایت کی۔ اجلاس میں کسان کارڈ کی تعداد 5 لاکھ سے ساڑھے 7 لاکھ کرنے ، کیش لمٹ30 فیصد تک بڑھانے کی منظوری بھی دی ۔ کسان کارڈ سے کاشتکاروں نے 46ارب روپے کی خریداری کا ریکارڈ قائم کر دیا۔ وزیر اعلیٰ نے کہا کسان رل گیا کا بیانیہ پٹ گیا، پنجاب کا کسان خوش اور خوشحال ہے ۔اجلاس کے دوران آگاہ کیا گیا کاشتکاروں کو 9ہزار گرین ٹریکٹرز کی فراہمی مکمل کر لی گئی۔ کابینہ نے چیف منسٹر سپیشل اینیشیٹو فار ڈائیلسزپروگرام کی منظوری دی جبکہ ڈائیلسز کے لئے فنڈز 7 لاکھ سے بڑھا کر 10لاکھ کر دئیے گئے ۔ اوورسیز پاکستانیوں کے لئے جائیداد سے متعلق امور کے فیصلے کے لئے سپیشل عدالت قائم کرنے کی منظوری دی گئی۔ پنڈی گھیپ میں غیر ملکی ایکس پلورنگ کمپنی کو جعلی این او سی دینے پر کارروائی کی ہدایت کی گئی۔ وزیراعلٰی نے 2019میں جعلی این او سی ایشو کرنے والوں کے خلاف کارروائی کا حکم دیا۔ وزیراعلیٰ کی ہدایت پر بلوچستان کے علاقے بارکھان کے شہری کی درخواست پرمالی امداد کی منظوری دی گئی۔ پبلک پرائیویٹ سیکٹر میڈیکل ڈینٹل کالجز کے سیشن2024-25 کی ایڈمیشن پالیسی کی منظوری دی گئی۔

اسلام آباد کے لئے 30سیٹیں مختص کرنے کا فیصلہ کیا گیا۔ جرنلسٹ سپورٹ فنڈ کی سیڈ منی اور نادار صحافیوں کی مالی امداد کے لئے مختص رقم بڑھانے کی منظوری دی گئی۔ نوازشریف انسٹی ٹیوٹ آف کینسر ٹریٹمنٹ اینڈ ریسرچ ایکٹ ، پراپرٹی ٹیکس،ویلیو ایشن سسٹم کو رینٹل ویلیو سے کپٹل ویلیو پر منتقل کرنے ، سپیشل ایجوکیشن میں ٹیکنیکل کیڈر کی 340اسامیوں پر بھرتی ، فاریسٹ سروسز اکیڈمی گھوڑا گلی اور پنجاب فاریسٹ سکول بہاولپور میں بھرتیوں ،سرکاری سکولوں کے لئے سکول ٹیچنگ انٹرنزکی بھرتی،لوکل گورنمنٹ ڈیپارٹمنٹ کو شیخوپور، ننکانہ صاحب اور قصور میں بلڈنگ پلان، لینڈ یوز کنورجن اور پرائیویٹ سوسائٹیز کے لئے اختیارات تفویض کرنے ،پنجاب اسمبلی کے 3ایم پی ایز کی بطورممبر پی پی آر اے بورڈ آف مینجمنٹ نامزدگی ، ایل ڈی اے ٹربیونل میں 2اسسرزکی تعیناتی کی بھی منظوری دی گئی۔ اجلاس میں نوٹریزآرڈیننس 1961میں ترمیم ،پنجاب فرانزک سائنس ایجنسی ایکٹ 2007 کو منسوخ کر کے پنجاب فرانزک سائنس اتھارٹی ایکٹ 2024 کی منظوری دی گئی۔ اجلاس میں پنجاب کھل پنچائیت اتھارٹی کو ختم کرنے ، پنجاب لوکل گورنمنٹ ایکٹ 2022 میں ترمیم، فارسٹ ڈیپو رولز 2023 اورپنجاب فارسٹ ٹرانزٹ رولز 2023 کی منظوری دی گئی۔ وزیر اعلیٰ پنجاب مریم نواز سے پاکستان میں آذربائیجان کے سفیر خضر فرہادوف نے ملاقات کی۔ دوطرفہ تعلقات، تجارتی روابط، ثقافتی تبادلوں، اور مختلف شعبوں میں تعاون بڑھانے پر تبادلہ خیال کیا گیا۔

روزنامہ دنیا ایپ انسٹال کریں