گنڈاپور کی ناک کے نیچے سے 79کروڑ 90لاکھ روپے غائب ہوگئے :عظمیٰ بخاری
لاہور (سٹاف رپورٹر)وزیر اطلاعات پنجاب عظمٰی بخاری نے کہا ہے خیبرپختونخوا میں بینظیر نشوونما پروگرام میں بڑے پیمانے پر مالی غبن اور گھوسٹ ملازمین کا انکشاف ہوا ہے جس کے نتیجے میں ورلڈ فوڈ پروگرام نے اس پروگرام پر کام روک دیا ہے ۔
اپنے بیان میں انہوں نے کہا کرپشن کے خلاف جہاد کرنے والے علی امین گنڈاپور کی ناک کے نیچے سے799ملین غائب ہوگئے ہیں اور عوام کی خدمت کیلئے ملنے والا پیسہ سوشل ٹرولز کی جیبوں میں جارہا ہے ۔ انہوں نے کہا ورلڈ فوڈ پروگرام نے مالی بے ضابطگیوں،گھوسٹ ملازمین کے معاملے پر کے پی حکومت پرسوالات اٹھائے ہیں۔ سرکاری دستاویزات میں صرف تنخواہوں میں 799ملین کی بے ضابطگیوں کی نشاندہی کی گئی ۔ظالموں نے ماں اور بچے کی صحت پر خرچ ہونے والے فنڈز کو بھی نہیں بخشا۔