مریم نواز کی مراکز صحت کی بحالی،روڈز 30جون تک مکمل کرنیکی ہدایت

مریم نواز کی مراکز صحت کی بحالی،روڈز 30جون تک مکمل کرنیکی ہدایت

لاہور(دنیانیوز)وزیراعلیٰ مریم نواز شریف نے پنجاب کے روڈ ز کی تعمیر و مرمت مالی سال کے آخر تک مکمل کرنے اور تمام مراکز صحت کی تعمیر و بحالی کا پہلا فیز 30جون تک مکمل کرنے کی ہدایت کردی۔

مریم نواز تعمیر و بحالی کے بعد بنیادی مراکز صحت اور دیہی مراکز صحت کا خود معائنہ او رافتتاح کریں گی،انہوں نے پی اینڈ ڈی کو اضافی وسائل  پیدا کرنے کا ہدف دے دیا۔ وزیر اعلیٰ کی زیر صدارت خصوصی اجلاس میں گزشتہ روز پنجا ب بھر میں جاری روڈز اور ہیلتھ کے ڈویلپمنٹ پراجیکٹس کاجائزہ لیا گیا۔صوبائی سیکرٹری تعمیرات و مواصلات سہیل اشر ف نے ترقیاتی منصوبوں کے بارے میں تفصیلی بریفنگ دیتے ہوئے بتایا کہ روڈ بحالی پروگرام کے تحت 462 پراجیکٹس کی منظوری دی گئی جس میں سے 455پر کام شروع کردیاگیااور 25فیصد سے زائد کام مکمل ہوچکاہے ۔روڈ بحالی پروگرام فیز ٹوکے تحت 72سکیموں کی منظوری دی گئی،جن میں سے 67 پر کام شروع جبکہ مراکز صحت کی تعمیر و بحالی کا 75فیصد کام مکمل ہوچکا ہے ، پنجاب کے مختلف علاقوں میں 54 بنیادی مراکز صحت کی تعمیر و بحالی پوری طرح مکمل ہے جبکہ 1164 بنیادی مراکز صحت پر تعمیر و بحالی تکمیل کی جانب گامزن ہے ۔مریم نواز نے کہاکہ پنجاب بھر میں رابطہ سڑکو ں کی بحالی اور تعمیر و مرمت سے لاکھوں شہری مستفید ہو ں گے ،کھیت تا منڈی سڑک کی تعمیر سے معاشی سرگرمیاں بھی بڑھیں گی،نئے مریم نواز ہیلتھ کلینک بننے سے دور دراز علاقوں کے عوام کو صحت کی بہترین سہولتیں میسر ہوں گی، پہلی مرتبہ دیہات کے عوام کو شہروں کے اعلیٰ پرائیویٹ کلینکس کا ماحول ملے گا۔ وزیراعلی نے لاہور میں بہترین معیار کی ٹریفک مینجمنٹ کیلئے ایک اور انقلابی قدم اٹھالیا ،لاہور کی سڑکوں پر سائیکل اور موٹر سائیکل سواروں کے لئے الگ لین مختص کی جائے گی،جس سے سائیکل اور موٹرسائیکل سواروں کی حادثات سے حفاظت ہو گی،مرحلہ وار لاہور کی تمام سڑکوں پر بائیکر لینز بنائی جائیں گی۔ پہلے مرحلے میں فیروز پور روڈ پرکینال سے لاہور پل تک بائیکر لین کی تعمیر جاری ہے -1 کلومیٹر طویل بائیکرز لین کو سبزرنگ سے بنایا جا رہا ہے ۔

روزنامہ دنیا ایپ انسٹال کریں