سعودی عرب 1 ارب 20 کروڑ ڈالر کا ادھار تیل دیگا
اسلام آباد(نامہ نگار، اے پی پی، دنیا نیوز، مانیٹرنگ ڈیسک)پاکستان اور سعودی فنڈ فار ڈیویلپمنٹ کے درمیان 1ارب 20 کروڑ ڈالر کا ادھار تیل دینے سمیت 1.61ڈالر کے 2 معاہدوں پر دستخط کر دئیے گئے۔ اسلام آباد میں پاکستان اور سعودی فنڈ فار ڈیویلپمنٹ کے درمیان 2 شعبوں میں مفاہمتی یاد داشتوں پر دستخط کی تقریب ہوئی۔
اس موقع پر وزیراعظم شہبازشریف، نائب وزیراعظم و وزیر خارجہ اسحاق ڈار، وفاقی وزیر خزانہ محمد اورنگزیب، عطا تارڑ، مصدق ملک، سعودی سفیر نواف بن سعید المالکی ، سعودی فنڈ فار ڈیویلپمنٹ کے چیف ایگزیکٹو سلطان عبدالرحمن المرشد اور دیگر بھی موجود تھے ۔سعودی فنڈ کے ساتھایک سال کی مدت کیلئے ادھار تیل کی درآمد سہولت کے معاہدے پر دستخط کیے گئے ۔اسی طرح مانسہرہ میں واٹر سپلائی سکیم کے لیے 4 کروڑ 10 لاکھ ڈالر رعایتی قرض کی فراہمی کے معاہدے پر بھی دستخط کیے گئے ۔سیکرٹری اقتصادی امور ڈویژن ڈاکٹر کاظم نیاز اور سی ای او ایس ایف ڈی سلطان بن عبدالرحمان المرشد نے اپنی اپنی حکومتوں کی جانب سے معاہدوں پر دستخط کئے ۔ وزیر اعظم شہباز شریف سے سعودی فنڈ برائے ترقی کے وفد نے چیف ایگزیکٹو آفیسر سلطان بن عبدالرحمن المرشد کی قیادت میں ملاقات کی۔ وزیراعظم نے سعودی عرب اور پاکستان کے درمیان دیرینہ دوستی کا حوالہ دیتے ہوئے صحت، توانائی، انفراسٹرکچر اور تعلیم کے شعبوں میں پاکستان کو مالی امداد فراہم کرنے کے ساتھ ساتھ 2022 کے تباہ کن سیلاب کے بعد تعمیر نو کے لئے سعودی فنڈ برائے ترقی کی کوششوں کو سراہا۔
سعودی فنڈ کے چیف ایگزیکٹو آفیسر نے پرتپاک استقبال اور مہمان نوازی پر وزیراعظم اور حکومت پاکستان کا شکریہ ادا کیا۔انہوں نے وزیراعظم کو جاری منصوبوں بشمول مہمند ہائیڈرو پاور پراجیکٹ، گولن گول ہائیڈرو پاور پراجیکٹ، ملاکنڈ ریجنل ڈویلپمنٹ پراجیکٹ اور سعودی گرانٹس کے ذریعے فنڈ کئے گئے دیگر منصوبوں کے بارے پیشرفت سے آگاہ کیا۔وزیر اعظم نے سعودی فنڈ برائے ترقی کی امداد کو سراہتے ہوئے گرین انرجی اور بنیادی ڈھانچے کے شعبے میں فنڈ کے ساتھ اشتراک کے نئے منصوبوں پر کام کی رفتار کو تیز کرنے کی ضرورت پر زور دیا جن کے ذریعے پاکستان کی پائیدار ترقی کو یقینی بنانے میں مدد ملے گی۔ ایس ایف ڈی کے چیف ایگزیکٹو آفیسر نے مشترکہ منصوبوں پر جلد کارروائی کی یقین دہانی کرائی اور اس بات کا اعادہ بھی کیا کہ سعودی عرب شاہی خاندان کی قیادت میں پاکستان کو ہر ممکن مدد اور مسلسل تعاون فراہم کرے گا۔وزیراعظم نے آئل امپورٹ فنانسنگ فیسیلٹی پر دستخط کا خیرمقدم کیا۔قبل ازیں وفاقی وزیر خزانہ سینیٹر محمد اورنگزیب نے فنانس ڈویژن میں سعودی فنڈ فار ڈویلپمنٹ کے سی ای او سلطان عبدالرحمن المرشد سے ملاقات کی جس میں پاکستان سعودی اقتصادی تعلقات کے مختلف پہلوؤں پر تبادلہ خیال کیا گیا۔
