شکیل آفریدی کے بدلے عافیہ کوواپس لایاجاسکتا:امریکی وکیل
اسلام آباد(اپنے نامہ نگار سے )اسلام آباد ہائیکورٹ میں زیر سماعت ڈاکٹر عافیہ صدیقی کی امریکی قید سے رہائی اور وطن واپسی کیس میں متفرق درخواست میں ڈاکٹر عافیہ صدیقی کے امریکی وکیل کلائیو سمتھ نے نیا ڈیکلریشن عدالت میں جمع کروادیا۔
امریکی وکیل کلائیو سمتھ نے کہاشکیل آفریدی امریکہ کے حوالے کر کے عافیہ صدیقی کو وطن واپس لایا جا سکتا ہے ،جسٹس سرداراعجازاسحاق نے استفسارکیاکہ شکیل آفریدی امریکہ کو دے کر عافیہ صدیقی کو وطن واپس لانے سے متعلق حکومت کا کیا موقف ہے ؟، وزیراعظم پاکستان نے سابق امریکی صدر جوبائیڈن کو خط لکھا جس کا کوئی جواب نہیں آیا، کیاوزیراعظم کے خط کے جواب سے متعلق وزارت خارجہ نے قدم اٹھایا؟،نمائندہ وزارت خارجہ نے عدالت کو بتایاکہ ایڈیشنل سیکرٹری وزارتِ داخلہ کی قائم مقام امریکی سفیر سے ملاقات ہوئی،جسٹس سرداراعجازاسحاق خان نے وفاقی حکومت سے کلائیو سمتھ کے ڈیکلریشن پر جواب طلب کر تے ہوئے کہاڈیکلریشن میں جو بھی سوالات اٹھائے گئے ہیں ہر ایک سوال کا جواب دیا جائے ،مزید سماعت 21 فروری تک ملتوی کر دی گئی۔
