جنوری :ترسیلات زر میں اضافہ، 3ارب ڈالر تک پہنچ گئیں
کراچی(بزنس رپورٹر)جنوری 2025 کے دوران بیرون ملک مقیم پاکستانیوں کی ترسیلاتِ زر میں نمایاں اضافہ دیکھا گیا ہے جس کے نتیجے میں 3 ارب ڈالر کی آمد درج کی گئی ہے جس سے سالانہ 25.2 فیصد اضافہ ظاہر ہوتا ہے۔
اسٹیٹ بینک کی جانب سے جاری کردہ اعداد و شمار کے مطابق مالی سال 2025 کے پہلے 7 ماہ (جولائی تا جنوری)کے دوران مجموعی طور پر 20.80 ارب ڈالر کی ترسیلاتِ زر موصول ہوئیں جو گزشتہ مالی سال 2024 کی اسی مدت کے دوران موصول شدہ 15.8 ارب ڈالر کے مقابلے میں 31.7 فیصد زیادہ ہیں۔اسٹیٹ بینک کے جاری اعلامیے کے مطابق جنوری 2025ء کے دوران ترسیلات زر زیادہ تر سعودی عرب (728.3 ملین ڈالر)، متحدہ عرب امارات (621.7 ملین ڈالر)، برطانیہ (443.6ملین ڈالر)اور ریاست ہائے متحدہ امریکا (298.5 ملین ڈالر)سے آئیں۔اس شاندار اضافے کو معیشت کے لیے خوش آئند قرار دیا جا رہا ہے کیونکہ ترسیلاتِ زر زرمبادلہ کے ذخائر میں بہتری اور ملکی مالی استحکام میں اہم کردار ادا کرتی ہیں۔
