عمران خان کا آرمی چیف کو تیسرا کھلا خط
راولپنڈی (خبرنگار)بانی پی ٹی آئی عمران خان نے آرمی چیف جنرل عاصم منیر کو تیسرا کھلا خط لکھ دیا، جس میں انہوں نے عام انتخابات 2024 میں مبینہ دھاندلی کا معاملہ بھی اٹھایا ہے ۔
بانی پی ٹی آئی کے وکیل فیصل چودھری نے اڈیالہ جیل کے باہر دیگر وکلا کے ہمراہ میڈیا سے گفتگو کرتے ہوئے کہا بانی پی ٹی آئی نے خط کے مندرجات پارٹی رہنماؤں کو نوٹ کروا دئیے اورہدایات دے دیں کہ خط 6 پوائنٹس پر مشتمل ہوگا، خط میں ڈیپ سٹرکچرل ریفارمز، حکومت کی پالیسیوں سے جمہوریت کو پہنچنے والے نقصان و دیگر پوائنٹس شامل ہوں گے ۔ان کا کہنا تھا کہ نو مئی کے واقعہ پر ہم آج بھی جوڈیشل کمیشن کے قیام کے مطالبے پر قائم ہیں، آٹھ فروری کے بعد پنجاب میں چھاپوں کا سلسلہ تاحال جاری ہے ، وزیر آباد میں پولیس نے ہمارے ایک کارکن کا جنازہ نہیں پڑھنے دیا۔بانی سمیت آج پارٹی کے دیگر لیڈرز جی ایچ کیو کیس میں پیش ہوئے ہیں، عامر ڈوگر کو اپوزیشن کے ساتھ مذاکراتی کمیٹی کا ممبر بنایا گیا ہے ، سیاسی کمیٹی میں کچھ نئے ممبران کے اضافہ کا فیصلہ کیا گیا ہے ، پارٹی کی جانب سے آج باقاعدہ نوٹیفکیشن جاری کیا جائے گا۔
آئی ایل ایف کے صدر انتظار پنجوتھہ کو آج جیل میں نہیں جانے دیا گیا، وکلا کو جیل ٹرائل میں نہیں جانے دیا جارہا، صحافیوں میں بھی پک اینڈ چوز کیا جاتا ہے ، ہم جی ایچ کیو کیس میں بھی اوپن ٹرائل کی درخواست دائر کرینگے ، 26 ویں ترمیم کے بعد نظام عدل زمین بوس ہوگیا ہے ۔فیصل نے کہا کہ بانی پی ٹی آئی نے آرمی چیف کو تیسرا خط جاری کیا ہے ، خط میں الیکشن فراڈ کے ذریعے اقلیت کو اکثریت پر ترجیح دینے کا معاملہ اٹھایا گیا ہے ، بانی نے خط میں کہا ہے منی لانڈررز کو اقتدار میں بٹھایا گیا ہے ، دہشت گردی رول آف لا نہ ہونے کی وجہ سے بڑھ رہی ہے ، 18 لاکھ لوگ ملک چھوڑ گئے ہیں، 20 ارب ڈالر کا سرمایہ ملک سے باہر چلا گیا ہے ، ہم نے جب حکومت چھوڑی معیشت کی گروتھ 6 اشاریہ 4 فیصد تھی، کورٹ پیکنگ پی ٹی آئی کے خلاف کریک ڈاؤن کیلئے کی جارہی ہے ۔ قانون ورلڈ پروجیکٹ انڈیکس پر پاکستان 140 ویں نمبر ہے ، شیر افضل مروت کے حوالے سے پارٹی اپنا موقف دے دے گی، ہم شیر افضل کے بارے فیصلے کی تردید یا تصدیق نہیں کرینگے ، مروت کا معاملہ پارٹی کا انٹرنل معاملہ ہے پارٹی اس پر اپنا موقف دے دے گی۔
