فورسز کی خیبرپختونخوا میں کارروائیاں، 13 خوارج ہلاک
راولپنڈی (خصوصی نیوز رپورٹر،دنیا نیوز) خیبر پختونخوا میں سکیورٹی فورسز کے 5 الگ الگ آپریشنز میں 13 خوارج ہلاک ہو گئے ۔آئی ایس پی آر کے مطابق سکیورٹی فورسز نے ڈیرہ اسماعیل خان کے علاقے کلاچی میں انٹیلی جنس کی بنیاد پر آپریشن کیا۔
آپریشن کے دوران 5 خوارج کو ہلاک کر دیا گیا، لکی مروت میں کارروائی کے دوران 2 خوارج دہشتگردوں کو ہلاک کیا گیا۔شمالی وزیرستان کے علاقوں دوسالی اور ٹپی میں دو مختلف آپریشنز کے دوران شدید فائرنگ کے تبادلے میں 5 خوارج جبکہ ضلع خیبر میں کارروائی کے دوران ایک خوارج کو ہلاک کیا گیا۔آئی ایس پی آر کا کہنا ہے کہ ہلاک دہشتگردوں میں شاہ گل عرف روحانی بھی شامل ہے ، دہشتگرد سکیورٹی فورسز اور بے گناہ شہریوں پر حملوں میں ملوث تھے ، بھاری مقدار میں اسلحہ اور گولہ بارود برآمد کرلیا گیا۔ترجمان پاک فوج کے مطابق علاقے میں دیگر ممکنہ خوارج کے خاتمے کیلئے سینی ٹائزیشن آپریشن جاری ہے ، سکیورٹی فورسز ملک سے دہشت گردی کے خاتمے کیلئے پُرعزم ہیں۔صدر آصف علی زرداری، وزیراعظم شہبازشریف اور وزیر داخلہ محسن نقوی نے خیبر پختونخوا میں 5 مختلف کارروائیوں میں 13 دہشتگردوں کو جہنم واصل کرنے پر سکیورٹی فورسز کو خراج تحسین پیش کیا ہے ۔
