بجلی بلوں سے ہر قسم کے اضافی ٹیکس ختم کئے جائیں،حافظ نعیم
لاہور(مانیٹرنگ ڈیسک)امیر جماعت اسلامی حافظ نعیم الرحمن نے بجلی کی قیمت میں کمی کی خبروں کو خوش آئند قرار دیتے ہوئے حکومت سے مطالبہ کیا ہے کہ بجلی بلوں سے ہر قسم کے اضافی ٹیکسوں کا خاتمہ اور تنخواہ پر ٹیکس کی شرح کم کی جائے ۔
انہوں نے سماجی رابطے کی ویب سائٹ ایکس پر بیان میں کہا عوامی جدوجہد نے بجلی کی فی یونٹ قیمت میں کمی کا دروازہ کھول دیا اور قیمتوں میں کمی کی خبریں خوش آئند ہیں۔ پہلے حکومت آئی پی پیز سے بات کرنے کو تیار نہیں تھی، جماعت اسلامی کی مسلسل جدوجہد سے حکومت معاہدوں پر نظر ثانی پر مجبور ہوئی اور یوں قومی خزانے کو سینکڑوں ارب کی بچت ہوئی۔ان کا کہنا تھا کہ بجلی کی فی یونٹ قیمت اوسط لاگت پر ہونی چاہیے ، حکمرانوں کوتنخواہوں پر ٹیکس کی ظالمانہ شرح میں بھی کمی لانا ہوگی۔ جماعت اسلامی عوام کے حقوق کیلئے پرامن سیاسی مزاحمت جاری رکھے گی۔
