ڈی آئی خان :فورسز کا آپریشن ،سرغنہ سمیت 9خوارج ہلاک
اسلام آباد ،ڈیرہ اسماعیل خان(نامہ نگار ،مانیٹرنگ ڈیسک ،نیوزایجنسیاں)سکیورٹی فورسز نے ڈیرہ اسماعیل خان کے علاقے تکواڑہ میں آپریشن کرتے ہوئے سرغنہ سمیت9 خوارج کو ہلاک کردیا جبکہ اسلحہ اور گولہ بارود بھی برآمد کیا گیا ہے۔
پاک فوج کے شعبہ تعلقات عامہ (آئی ایس پی آر)کے مطابق خفیہ اطلاعات کی بنیاد پر 6 اور 7 اپریل کی درمیانی شب آپریشن کیا گیا، جس کے دوران سکیورٹی فورسز نے خوارج کے ٹھکانے کو موثر انداز میں نشانہ بنایا اور شدید فائرنگ کے تبادلے کے نتیجے میں 9 خوارج ہلاک ہوگئے ۔ آپریشن کے دوران ہائی ویلیو ٹارگٹ خوارجی سرغنہ شیریں بھی ہلاک ہوگیا، ہلاک خوارجیوں سے ہتھیار اور گولیاں برآمد کی گئیں۔آئی ایس پی آر کا کہنا ہے کہ خوارجی سرغنہ شیریں قانون نافذ کرنے والے اداروں کوانتہائی مطلوب تھا، خوارجی سرغنہ بہت سی دہشت گردی کی کارروائیوں میں ملوث تھا، خوارج کئی معصوم شہریوں کی ٹارگٹ کلنگ میں بھی ملوث تھے ، خوارجی سرغنہ 20 مارچ کو کیپٹن حسنین اختر کی شہادت کا بھی ذمہ دار تھا۔ علاقے میں سرچ اور کلیئرنس آپریشن جاری ہے تاکہ کسی بھی بچے ہوئے خارجی کو انجام تک پہنچایا جا سکے ۔صدرمملکت آصف علی زرداری نے ڈی آئی خان میں دہشت گردوں کے خلاف کامیاب آپریشن پر سکیورٹی فورسز کو خراج تحسین پیش کرتے ہوئے کہا کہ کارروائی میں دہشت گردوں کے سرغنہ کو ہلاک کرنا سکیورٹی فورسز کی بڑی کامیابی ہے ،دہشت گرد عناصر کے خاتمے ، ملکی دفاع کیلئے ہمارا عزم غیر متزلزل رہے گا۔وزیراعظم شہباز شریف نے کہا کہ دہشت گردی کے خلاف جنگ میں پوری قوم سکیورٹی فورسز کے ساتھ کھڑی ہے ، ملک سے ہر قسم کی دہشت گردی کے مکمل خاتمے کیلئے پر عزم ہیں۔ وفاقی وزیر داخلہ محسن نقوی نے کہا کہ سکیورٹی فورسز کی بہادری اور پیشہ و رانہ صلاحیتوں کی پوری قوم معترف ہے۔
