پی ٹی آئی رہنماؤں پر مائنز اینڈ منرل بل سے متعلق بیانات پرپابندی عائد
اسلام آباد(آئی این پی)پی ٹی آئی سیاسی کمیٹی نے خیبرپختونخوا اسمبلی میں مائنز اینڈ منرل ترمیمی بل سے متعلق بیانات پر پابندی عائد کردی جبکہ بل پر بریفنگ کیلئے منتخب نمائندوں کا اجلاس چودہ اپریل کو طلب کرلیا گیا۔
سیاسی کمیٹی نے صوبائی حکومت کو بلز پر جلد بازی نہ کرنے کی بھی ہدایت کر دی۔پی ٹی آئی کی سیاسی کمیٹی اجلاس میں فیصلہ کیاگیا کہ بلز پر کسی کارکن یارکن نے بات کی تو اس کیخلاف کارروائی ہوگی جبکہ حکومت تمام سٹیک ہولڈرز کو اعتماد میں لیے بغیر بل اسمبلی میں پیش نہ کرے ۔دوسری جانب اے این پی نے منرلز اینڈ مائنز ایکٹ 2025 کو مسترد کردیا۔اے این پی خیبرپختونخوا کے صدر افتخار حسین کا کہنا ہے کہ منرلز اینڈ مائنز کا ایکٹ پہلے سے موجود ہے ، نئے ایکٹ کی ضرورت ہی نہیں، یہ بل 18 ویں آئینی ترمیم کیخلاف ہے جس میں یہ فیصلہ ہوا تھا کہ ہر صوبے کا اپنے قدرتی وسائل پر حق ہوگا۔
