اسحاق ڈار آج اعلیٰ سطحی وفد کے ہمراہ کابل جائیں گے
اسلام آباد(وقائع نگار ،اے پی پی)نائب وزیراعظم اور وزیر خارجہ سینیٹر محمد اسحاق ڈار عبوری افغان وزیر خارجہ کی دعوت پر آج ہفتہ کو اعلیٰ سطح وفد کی قیادت کرتے ہوئے کابل کا دورہ کریں گے ۔
ترجمان دفتر خارجہ کی جانب سے جاری بیان کے مطابق نائب وزیر اعظم ایک روزہ دورے کے دوران افغان قائم مقام وزیر اعظم ملا محمد حسن اخوند، قائم مقام نائب وزیر اعظم برائے اقتصادی امور ملا عبدالغنی برادر سے ملاقات اور قائم مقام وزیر خارجہ امیر خان متقی سے وفود کی سطح پر بات چیت کریں گے ۔ مذاکرات میں پاک افغان تعلقات کے تمام پہلوؤں کا احاطہ کیا جائے گا جس میں باہمی مفادات کے تمام شعبوں بشمول سکیورٹی، تجارت، رابطے اور عوام سے عوام کے تعلقات میں تعاون کو وسعت دینے کے طریقوں اور ذرائع پر توجہ دی جائے گی۔ اسحاق ڈار نے دورہ افغانستان سے قبل جمعہ کو بین الوزارتی اجلاس کی صدارت کی۔ دفتر خارجہ کی جانب سے جاری بیان کے مطابق افغانستان کے بارے میں نمائندہ خصوصی صادق خان، وزیراعظم کے معاون خصوصی طارق باجوہ، تجارت، ریلوے اور داخلہ کے وفاقی سیکرٹریز اور ایف بی آر اور وزارت خارجہ کے اعلیٰ حکام نے اجلاس میں شرکت کی۔ اجلاس میں دورے کے تمام پہلوئو ں کا تفصیلی جائزہ لیا گیا جس میں دو طرفہ تعاون کو آگے بڑھانے اور علاقائی روابط کو فروغ دینے پر توجہ دی گئی۔
