ملزم کی پیشی پر ضمانتی مچلکے جمع کرانیوالے کی ذمہ داری ختم:جسٹس عبہر
لاہور(محمد اشفاق سے )لاہور ہائیکورٹ نے ناجائز اسلحہ کیس میں ملزم کی عدم پیشی پر ضمانتی مچلکے جمع کرانیوالے کو ایک لاکھ روپے جرمانے کا ٹرائل کورٹ کا فیصلہ کالعدم قرار دے دیا اور کہا ملزم کے پیش نہ ہونے پر ضمانتی مچلکے جمع کرانیوالے کیخلاف کارروائی نہیں ہوسکتی ۔
جسٹس عبہر گل خان نے کمیر خان کی اپیل پر چار صفحات پر مشتمل فیصلہ جاری کردیا، جسٹس عبہر گل نے فیصلے میں لکھا کہ کسی ملزم کو ضمانت دینا جسٹس سسٹم کا بنیادی فرض ہے ۔ ضمانت دینے سے جیلوں میں موجود لوگوں کی رہائی ہوتی ہے جس سے جیلوں پر بوجھ کم کرنے میں مدد ملتی ہے ، بعض اوقات لوگ خدمت خلق کے طور پر بھی ضمانتی مچلکے جمع کراتے ہیں،ضمانت کے بعد جب ملزم پیش ہوجاتا ہے تو پھر ضمانتی مچلکے جمع کرانیوالے کی ذمہ داری ختم ہوجاتی ہے پھر معاملہ عدالت اور ملزموں کے درمیان رہتا ہے اسی بنیاد پر ٹرائل کورٹ کی جانب سے ملزم کے پیش نہ ہونے پر مچلکے جمع کرانیوالے کیخلاف کارروائی کا فیصلہ کالعدم قرار دیا جاتا ہے ۔ٹرائل کورٹ نے اسلحہ رکھنا کے مقدمہ میں ملزم کی ضمانت منظور کی تھی،ٹرائل میں عدم پیشی پر ملزم کے ضمانتی مچلکے جمع کرانیوالے شخص کو ایک لاکھ جرمانہ ادا کرنے کا حکم دیا گیاتھا۔
