پاکستان نے بھارت کو شکست دے کر غزہ کا بدلہ لیا:فضل الرحمن
لاہور(مانیٹرنگ ڈیسک)جمعیت علما اسلام کے سربراہ مولانا فضل الرحمن نے کہا ہے کہ بھارت اور اسرائیل کا اتحاد تاریخ کا حصہ ہے ، مودی سرکاری نے اسرائیلی نمائندہ بن کر پاکستان پر حملہ کیا مگر ہم نے بھارت کو شکست دے کر غزہ کا بدلہ لے لیا۔
کوئٹہ میں جے یو آئی کی جانب سے منعقدہ بھارت اور اسرائیل مخالف ملین مارچ سے خطاب کرتے ہوئے انہوں نے کہا کہ اسرائیل کے حوالے سے حکمران خواب خرگوش میں مصروف تھے مگر ہم نے روز اول سے اسرائیل کی مخالفت کی اور آئندہ بھی کرتے رہیں گے جبکہ یہود ہنود ایک ہیں، اس معاملے پر پارلیمنٹ نے بھی جے یوآئی کا موقف تسلیم کرلیا۔مولانا نے کہا کہ پاکستان کو مستقبل میں بھی انڈیا اسرائیل گٹھ جوڑ سے محتاط رہنا چاہیے ، مسلم حکمران ہمت کریں تو اسرائیل کی قوت کو ختم کرسکتے ہیں۔انہوں نے کہا کہ مودی نے طاقت کے بل بوتے پر تنازعات حل کرنے کی کوشش کی، اب اس سے اسمبلی میں نہیں بیٹھا جارہا، مودی کو اسکی اپنی پارلیمنٹ لعن طعن کررہی ہے ۔ہم اپنے اوپر غلط نظر ڈالنے والوں کو کسی صورت بھی برداشت نہیں کریں گے ۔
