افغانیوں کی جعلی کاغذات پر بیرون ملک روانگی ، ایف آئی اے گوجرانوالہ کے 10 اہلکاروں کیخلاف مقدمہ
لاہور(اپنے کامرس رپورٹر سے )سیالکوٹ ایئرپورٹ سے درجنوں افغان شہریوں کو جعلی کاغذات پر بیرون ملک فرار کرانے کے معاملہ پر ایف آئی اے گوجرانوالہ نے کارروائی کرتے ہوئے اپنے ہی دس اہلکاروں کے خلاف مقدمہ درج کر لیا جبکہ چھ ٹریول ایجنٹس کو بھی اسی مقدمے میں نامزد کیا گیا ہے ۔
ایف آئی اے ترجمان کے مطابق ملزم سیالکوٹ ایئرپورٹ پر تعینات تھے اور مبینہ طور پر چالیس سے زائد افغان باشندوں کو جعلی دستاویزات پر بیرون ملک بھجوانے میں ملوث پائے گئے ۔تحقیقات کے دوران یہ بات سامنے آئی کہ افغان شہریوں کی جعلی شناختی دستاویزات کی نادرا اور پاسپورٹ آفس سے تصدیق کرائی گئی تھی، جنہوں نے واضح طور پر بتایا کہ ان افراد کا کوئی ریکارڈ موجود نہیں۔ یہ سکینڈل اس وقت سامنے آیا جب ایک افغان شہری کے فرار کی شکایت پر انکوائری کا آغاز کیا گیا۔
روزنامہ دنیا ایپ انسٹال کریں
