کرپٹومیں پاکستان کاتجارتی حجم 300ارب ڈالر:بلال ثاقب
راولپنڈی(دنیا نیوز)پاکستان کرپٹو کونسل کے سی ای او بلال ثاقب نے کہا کرپٹو میں پاکستان کا سالانہ تجارتی حجم 300 ارب ڈالر سے زائد ہے ۔ ایک روز قبل فیلڈ مارشل سید عاصم منیر سے ہونے والی ملاقات کے بارے میں انہوں نے کہا ملاقات میں ملک کی ڈیجیٹل معیشت کے مستقبل پر گفتگو کی گئی۔
ملاقات کا مقصد نوجوانوں کو بلاک چین، کرپٹو کرنسی اور مصنوعی ذہانت کے ذریعے بااختیار بنانا تھا۔بلال بن ثاقب نے کہا نوجوان عالمی ٹیکنالوجی کے منظر نامے میں اپنی جگہ چاہتے ہیں، اس لیے کونسل بنائی گئی۔ہم ایک ایسی کونسل کیلئے کام کر رہے ہیں جو ڈیجیٹل فنانس، سینٹر لائزیشن اور اے آئی کو موقع سمجھتی ہے ۔انہوں نے کہا فیلڈ مارشل عاصم منیر کو کرپٹو کونسل کی حالیہ کامیابیوں اور عالمی سطح پر کرپٹو و بلاک چین میں پاکستان کی پیشرفت سے آگاہ کیا ہے ، ملاقات میں نوجوانوں کو بلاک چین، کرپٹو اور مصنوعی ذہانت کے ذریعے بااختیار بنانے کے عزم کا اظہار کیا گیا، بلال بن ثاقب نے کہا نوجوانوں اور سٹارٹ اپس کو بلاک چین حل تیار کرنے کے لیے سہولت فراہم کی جائے گی، جلد لاس ویگاس میں بٹ کوائن 2025 کانفرنس میں عالمی قائدین کے ہمراہ خطاب کریں گے ۔انہوں نے کہا پاکستان دنیا بھر میں کرپٹو اپنانے والے سرِفہرست پانچ ممالک میں شامل ہے ۔ملک کی 70 فیصد آبادی 30 سال سے کم عمر اور کرپٹو اور ڈیجیٹل معیشت کیلئے مثالی ہے ، پاکستان دنیا کی تیسری بڑی فری لانسنگ مارکیٹ ہے ، نوجوانوں کی عالمی معیشت میں بھرپور شرکت ہے ، ہر سال 50 ہزار آئی ٹی گریجویٹس پاکستان کی ڈیجیٹل ترقی میں شامل ہوتے ہیں۔ پاکستان میں نوجوانوں کو ڈیجیٹل لیڈرز بنانے کے لیے جامع قومی حکمت عملی ترتیب دی جائے ، نوجوان صرف مستقبل نہیں، تبدیلی کے آج کے محرک ہیں، پاکستان کی بلاک چین و کرپٹو پالیسی عالمی پلیٹ فارم پر اپنی جگہ بنا رہی ہے ۔
