عمران کو اندازہ ہے قیادت کے تلوں میں تیل نہیں : شیرافضل
اسلام آباد(دنیا نیوز)ایم این اے شیر افضل مروت نے کہا ہے کہ عمران خان کو اندازہ ہوگیا ان کی قیادت کے تلوں میں تیل نہیں۔ دنیا نیوز کے پروگرام ‘‘ٹونائٹ ود ثمر عباس’’ میں گفتگو کرتے ہوئے شیر افضل مروت کا کہنا تھا کہ پی ٹی آئی میں مایوسی قیادت نے خود پھیلائی ہے، مزاحمتی طاقت کوخود ہی پی ٹی آئی نے پارہ پارہ کیا۔
انہوں نے کہا کہ ذمہ داروں نے مجھے عمران خان سے ملاقات کرنے کا کہا، اب میں اپنی مرضی سے جاؤں یا نہیں جاؤں گا، پہلے مانا جائے کہ میرے ساتھ زیادتی ہوئی پھر ملاقات کے لیے جاؤں گا۔ایم این اے کا کہنا تھا کہ بانی پی ٹی آئی کی خلاصی صرف احتجاج کے ذریعے ہو سکتی ہے ، موجودہ قیادت احتجاج سے کتراتی ہے، پی ٹی آئی کو غلط اور بدنیتی پرمبنی فیصلوں سے پاک کرنا ہوگا،عمران خان کوجیل میں رکھنے سے استحکام نہیں آئے گا۔شیرافضل مروت نے مزید کہا کہ نہیں سمجھتا کہ حکومت کی سیاسی گرفت مضبوط ہوئی ہے ، پی ٹی آئی کا ہرفیصلہ ہی ناقص رہا، مجھے پہلے پارٹی سے نکالا اور پھر گالیاں بھی دیں، بانی کواندازہ ہو گیا ہے کہ ان کی قیادت کے تلوں میں تیل نہیں، سلمان اکرم راجہ نے علیمہ خان کے لیے سیاسی بات کرنے کی راہ ہموار کی۔
