آبی ذخائر کیلئے وسائل کی فراہمی 20 رکنی کمیٹی کا نوٹیفکیشن جاری
اسلام آباد (مانیٹرنگ ڈیسک،آ ن لائن )وزیر اعظم شہباز شریف کی طرف سے قائم کی گئی آبی ذخائر کی تعمیر کے لیے وسائل کی فراہمی سے متعلق کمیٹی کا نوٹیفکیشن جاری کردیا گیا۔ 20 رکنی کمیٹی کی سربراہی نائب وزیراعظم اسحاق ڈار کریں گے ۔
نوٹیفکیشن کے مطابق وفاقی وزرا، مشیر، وزرائے اعلیٰ اور اعلیٰ حکام کو اس کا رکن مقرر کیا گیا ہے یہ کمیٹی تمام متعلقہ صوبوں اور سٹیک ہولڈرز سے مشاورت کے بعد 9 جون تک اپنی سفارشات کو حتمی شکل دے گی۔نوٹیفکیشن کے مطابق کمیٹی کو اختیار حاصل ہوگا کہ وہ کسی بھی موزوں فرد کو بطور رکن شامل کر سکتی ہے تاکہ اس کام کی تکمیل ممکن ہو سکے ، کابینہ ڈویژن اس کمیٹی کو سیکرٹریٹ کی سطح پر معاونت فراہم کرے گی۔کمیٹی میں وزیر منصوبہ بندی، ترقی و خصوصی اقدامات احسن اقبال ،وزیر خزانہ محمد اورنگزیب، وزیر قانون و انصاف اعظم نذیر تارڑ، وزیر اقتصادی امور و اسٹیبلشمنٹ، وزیر آبی وسائل،قومی سلامتی کے مشیر لیفٹیننٹ جنرل عاصم ملک ،وزیراعلیٰ پنجاب مریم نواز، وزیراعلیٰ بلوچستان سرفراز بگٹی، وزیراعلیٰ خیبرپختونخوا علی امین گنڈا پور ، وزیراعلیٰ سندھ سید مراد علی شاہ ،وزیراعظم آزاد جموں و کشمیر انوارالحق ،وزیراعلیٰ گلگت بلتستان، وزیراعظم کے مشیر برائے بین الصوبائی رابطہ ، معاون خصوصی طارق باجوہ، سیکرٹری کابینہ، سیکرٹری اقتصادی امور ڈویژن، سیکرٹری خزانہ، سیکرٹری آبی وسائل، سیکرٹری منصوبہ بندی، ترقی و خصوصی اقدامات بھی کمیٹی کا حصہ ہیں۔
