عالمی حالات کے پیش نظر احتجاجی تحریک 2ہفتوں کیلئے موخر،قوم متحدہو جائے:بانی پی ٹی آئی
راولپنڈی (خبر نگار)بانی پی ٹی آئی کی بہنوں نورین خانم اور عظمیٰ خان نے کہا ہے کہ بانی نے احتجاجی تحریک کو عالمی حالات کے پیش نظر دو ہفتوں کیلئے موخر کر دیا ہے۔
ہم پاکستان کی پالیسی کے حوالے سے وزیر اعظم، صدر اور فیلڈ مارشل کے بیان کا انتظار کر رہے ہیں، بانی کو اندرونی و بیرونی حالات پر سخت تشویش ہے ،بانی پی ٹی آئی سے ملاقات کے بعد اڈیالہ جیل کے باہر میڈیا سے گفتگو میں نورین خانم کا کہنا تھا کہ بانی کی ایک ہفتہ سے کسی سے کوئی ملاقات نہیں تھی تاہم انہیں عالمی حالات کے بارے میں معلومات تھیں،بانی نے کہا عالمی حالات کا ملک پر اثر پڑے گا سب پاکستانیوں کو اس وقت متحد ہونا چاہیے ،انہوں نے احتجاجی تحریک کو 2 ہفتوں کیلئے موخر کردیا ہے ، بجٹ پر بانی نے کہا یہ ایلیٹ کلچر کا بجٹ ہے ، غریب کے حالات بہت برے ہو گئے ہیں، سارا ٹیکس تنخواہ دار طبقہ دے رہا ہو گا وہی بوجھ اٹھاتا ہے ، پاکستان میں مزید غربت بڑھے گی،حالات بھی خراب ہو رہے ہیں، 33 لاکھ تعلیم یافتہ لوگ تین سال میں ملک چھوڑ کر گئے ، ملک چھوڑ کر جانے والے 30 ہزار ڈالر ساتھ لے جاتے ہیں دیکھ لیں کتنا فارن ایکسچینج ملک سے باہر گیا، کے پی کابجٹ مشاورت کے بعد پاس ہوگا۔ علی امین، تیمور جھگڑا، مزمل اسلم، شبلی فراز ملاقات کے لئے آئیں ان سے مشاورت ہو گی تو کے پی کا بجٹ پاس ہوگا،عظمیٰ خان نے میڈیا سے گفتگو میں کہا بانی نے موجودہ حالات میں پاکستانی قوم کو اکھٹا ہونے اور سب کو اتحاد کی طرف توجہ دینے کا بولا ہے ،علی امین نے احتجاج سے لاتعلقی نہیں کی، بانی کے لئے دنیا میں جو بھی احتجاج کرے گا ہم ان کے ساتھ ہیں،بانی اس احتجاج پر ہنس رہے تھے ،اسرائیل پر بانی کا جو موقف ہے وہ سب کو پتہ ہے ۔ زررداری، نواز شریف اور مریم نواز پاک بھارت جنگ میں کچھ نہیں بولے تھے ، امید کر رہے ہیں یہ 17سیٹوں والے جو ہمارے اوپر آئے ہیں ہمیں کچھ بتائیں گے یہ انکا کام ہے ، بانی کہتے ہیں غزہ میں جو ہو رہا ہے اس کی بہت تکلیف ہے ۔
