بجلی بلوں سے صوبائی الیکٹریسٹی ڈیوٹی ختم کرنیکا فیصلہ
اسلام آباد(نامہ نگار، مانیٹرنگ ڈیسک)وفاقی حکومت نے بجلی بلوں سے ٹی وی فیس ختم کرنے کے بعد صوبائی ‘الیکٹریسٹی ڈیوٹی’ ختم کرنے کا فیصلہ کیا ہے۔
وفاقی وزیر توانائی اویس لغاری نے تمام صوبوں کے وزرائے اعلیٰ کو خطوط ارسال کر دئیے۔ خط میں وفاقی وزیر توانائی کا کہنا تھا کہ جولائی 2025 سے بجلی بلوں کے ذریعے صوبائی الیکٹریسٹی ڈیوٹی کی وصولی بند ہو گی۔ان کا کہنا تھا کہ بجلی کے بلوں میں ٹیکسوں کا بوجھ کم کرنا چاہتے ہیں، بلوں میں متعدد چارجز اور ڈیوٹیوں سے صارفین الجھن کا شکار ہیں۔خط میں وفاقی وزیر نے بجلی کے نرخ کم کرنے کے حکومتی اقدامات بھی اجاگر کیے اور آئی پی پیز معاہدوں پر نظرثانی، سرکاری پاور پلانٹس کا آر او ای کم کرنے پر کام جاری رکھنے کا بھی ذکر کیا۔اویس لغاری نے مطالبہ کیا کہ صوبے متبادل ذرائع سے ڈیوٹی وصولی کے طریقے تجویز کریں اور کہا کہ بل صرف بجلی کے اصل خرچ کو ظاہر کریں، یہی ہمارا ہدف ہے ۔انہوں نے مزید کہا کہ صارفین صرف بجلی کی قیمت ادا کریں، اضافی چارجز کا خاتمہ چاہتے ہیں۔ اپنے خطوط میں وفاقی وزیر نے مختلف چارجز، ٹیکسز اور ڈیوٹیز کی وجہ سے صارفین کے بلوں میں پیدا ہونے والی پیچیدگی ختم کرنے کے لیے وزرائے اعلیٰ سے تعاون کی درخواست کی ہے۔
