زرعی ترقیاتی بینک کی نجکاری کیلئے مالیاتی مشیر کی تقرری منظور
اسلام آباد (اے پی پی)نجکاری کمیشن بورڈ نے وزیراعظم کے مشیر برائے نجکاری اور چیئرمین نجکاری کمیشن محمد علی کی زیر صدارت اجلاس میں زرعی ترقیاتی بینک لمیٹڈ (زیڈ ٹی بی ایل)کی نجکاری کیلئے مالیاتی مشیر کی تقرری کی منظوری دیدی ۔
مسابقتی اور شفاف انتخاب کے عمل کے بعد بورڈ نے زیڈ ٹی بی ایل ٹرانزیکشن کیلئے نیکسٹ کیپٹل لمیٹڈ کی قیادت میں مالیاتی مشیروں کے کنسورشیم کی منظوری دی۔ کنسورشیم کے دیگر ارکان میں اعجاز اینڈ ایسوسی ایٹس ، بیکر ٹلی محمود ادریس قمر ، ایگزیکٹوز نیٹ ورک انٹرنیشنل، برج پبلک ریلیشنز ، سکولز پاکستان پرائیویٹ لمیٹڈ اور پرائما گلوبل کنسلٹنگ پرائیویٹ شامل ہیں۔ اعلامیہ کے مطابق چھ بولی دہندگان کی مالی درجہ بندی کی گئی جن میں عارف حبیب لمیٹڈ، اے ایف فرگوسن، اے کے ڈی سکیورٹیز لمیٹڈ، برج فیکٹر اور جے ایس بینک کی سربراہی میں کنسورشیم شامل ہیں۔ نجکاری بورڈ نے منتخب کنسورشیم کیساتھ مالیاتی مشاورتی خدمات کے معاہد ہ کو حتمی شکل دینے کیلئے مذاکراتی کمیٹی بنانے کی بھی منظوری دی ۔
