امن کی بحالی کیلئے موثر اقدامات کیے جائیں، ضم قبائلی اضلاع کا جرگہ
پشاور(مانیٹرنگ ڈیسک)جے یوآئی کے زیر اہتمام خیبر پختونخوا کے ضم قبائلی اضلاع کا جرگہ ہوا جس سے سربراہ جے یو آئی مولانا فضل الرحمان اور دیگر قبائلی مشران نے خطاب کیا۔۔۔
جرگہ میں مولانا جمال الدین، مولانا عبدالرشید، ملک نصراللہ خان، ملک شاہین، ملک خان مرجان، مفتی بیت اللہ ،ملک نادر منان، عبد الخالق پٹھان ، مفتی مصباح الدین ایم این اے ، ملک شیرین ،ڈاکٹر جی جی جمال اور دیگرز قبائلی زعماء نے تجاویز پیش کیں۔ جرگہ کا مشترکہ اعلامیہ جاری کیا گیا جس میں کہاگیا کہ جرگہ قبائل میں دہشت گردی کے واقعات، ٹارگٹ کلنگ پر افسوس اور تشویش کا اظہار کرتا ہے، جرگہ امن کی بحالی کے لیے مؤثر اقدامات، عوام کے جان و مال کے تحفظ اور قبائل میں عمل درآمد کا مطالبہ کرتا ہے، قبائل میں جرگہ سسٹم کی بحالی کے لئے قائم کردہ کمیٹی پر تحفظات کا اظہار کرتے ہوئے کہا گیا کہ عوام کی نمائندگی اور ان کی رائے کے بغیر کوئی فیصلہ قابل قبول نہیں ہوگا، پشتونوں کی قیادت اور قبائلی مشران کو دوبارہ طلب کرکے ایک مؤثر لائحہ عمل کے ساتھ آگے کی طرف بڑھا جائے، اعلامیہ کے مطابق یہ جرگہ قبائل کے نقشہ مکانی کے غلط فیصلے کو مسترد کرتا ہے، یہ جرگہ ابراہیمی معاہدہ کو خلاف اسلام قرار دیتے ہوئے اسے مسترد کرتا ہے ،جرگہ منزل اپنڈا منصوبہ کو مسترد کرتے ہوئے اسے ملکی اور قبائلی عوام کے مفاد کے خلاف قرار دیتا ہے۔
