بنوں:پولیس چیک پوسٹوں تھرمل کیمرا ٹیکنالوجی پر حملہ ناکام
بنوں (مانیٹرنگ ڈیسک)خیبرپختونخوا کے ضلع بنوں میں پولیس نے دو چیک پوسٹوں اور تھرمل کیمرا ٹیکنالوجی پر خوارج کے حملے ناکام بنا دئیے ۔گزشتہ شب خوارج نے تھانہ ہوید بنوں کی حدود میں واقع چیک پوسٹ شیخ لنڈک پر ڈرون اور چیک پوسٹ مزانگہ پر چھوٹے بڑے جدید ہتھیاروں سے حملے کیے ۔
حملے میں پولیس کی تھرمل کیمرہ ٹیکنالوجی کو نشانہ بنانے کی کوشش کی گئی۔پولیس اہلکاروں نے پیشہ ورانہ مہارت، دلیری اور ہوشیاری کا مظاہرہ کرتے ہوئے بروقت اور مؤثر جوابی کارروائی کی اور دونوں حملوں کو پسپا کر دیا۔ بھرپور جوابی کارروائی کے نتیجے میں دہشت گرد فرار ہونے پر مجبور ہو گئے ، جبکہ حملے میں چوکی کی عمارت، پولیس تنصیبات اور نفری محفوظ رہی۔پولیس کی جانب سے علاقے میں سرچ اینڈ کلیئرنس آپریشن شروع کر دیا گیا ہے تاکہ فرار ہونے والے عناصر کو قانون کے کٹہرے میں لایا جا سکے ۔آئی جی خیبرپختونخوا ذوالفقار حمید اور آر پی او بنوں سجاد خان نے بنوں پولیس کی جرات مندانہ کارروائی کو سراہتے ہوئے تمام جوانوں کو شاباش دی اور انعامات کا اعلان کیا۔ انہوں نے کہا کہ یہ بزدلانہ کارروائیاں ہمارے حوصلے پست نہیں کر سکتیں۔آئی جی خیبرپختونخوا نے مزید کہا کہ خیبرپختونخوا پولیس ہر محاذ پر چوکنا، مستعد اور مکمل طور پر تیار ہے ۔ آئندہ بھی ایسے تمام حملوں کا بھرپور اور جرات مندانہ انداز میں جواب دیا جائے گا۔ پولیس فورس دہشت گردی کے خلاف جنگ میں فرنٹ لائن پر ہے اور عوام کے تحفظ کے لیے ہر ممکن قدم اٹھایا جائے گا۔
