اسلام آباد ہائیکورٹ:توہین مذہب مقدمات کی تحقیقات کیلئے کمیشن قائم کرنیکا فیصلہ معطل
اسلام آباد(اپنے نامہ نگارسے )اسلام آباد ہائیکورٹ کے ڈویژن بینچ نے توہین مذہب الزامات پر کمیشن تشکیل دینے کے فیصلے کے خلاف اپیلوں میں سنگل بینچ فیصلہ پرعملدرآمد روک دیا۔
دوران سماعت جسٹس خادم حسین سومرو نے استفسار کیاکہ اس فیصلے سے آپ متاثرہ کیسے ہیں ؟ جس پر کامران مرتضیٰ ایڈووکیٹ نے کہا ہمیں مکمل حق سماعت نہیں دیا گیا،چار سو کیسز ہیں اور کچھ کیسز اس کورٹ کے دائرہ اختیار سے باہر ہیں،کیا اس کیس میں کمیشن تشکیل دیا جا سکتا ہے ؟، کمیشن کی تشکیل کا اختیار وفاقی حکومت کا ہے ،درخواستگزار وکلاء کاکہنا تھا کہ عدالت میں یہ کیس نمٹا گیا تھا پھر تحریری فیصلہ آیا کہ کیس زیر التوا رہے گا،کیا کسی اور کی طرف سے رٹ پٹیشن قابل سماعت ہو سکتی ہے ؟ کامران مرتضیٰ ایڈووکیٹ نے کہا بے شک بھائی بیٹا یا باپ ہو ان میں سے کوئی بھی ہو متاثرہ فریق کیسے ہے ؟،آرڈر ایسے کر رہے ہیں جیسے سپریم کورٹ سے بھی اوپر کی عدالت ہے ، جسٹس اعظم خان نے استفسار کیاکہ فائنل آرڈر کے بعد کیا کیس زیر التوا رکھ سکتے ہیں ؟، وکلاء نے کہاکہ جاری نہیں رکھ سکتے ،عدالت نے ابتدائی سماعت کے بعد اپیل قابل سماعت ہونے پر فیصلہ محفوظ کرلیا، جسٹس خادم حسین سومرو نے وکلاء کو ہدایت کی کہ ابتدائی آرڈر ریڈر سے معلوم کر لیجئے گا، بعدازاں جسٹس خادم حسین سومرو اور جسٹس اعظم خان پرمشتمل ڈویژن بینچ نے جسٹس سردار اعجازاسحاق خان کا فیصلہ معطل کرتے ہوئے 30 روز میں کمیشن تشکیل دینے کے فیصلہ پر عملدرآمد روک دیا۔
