حکومت کا سوشل میڈیا کمپنیوں سے دہشتگردوں کے اکاؤنٹس بند،شیئر کرنے کا مطالبہ
اسلام آباد(مانیٹرنگ ڈیسک)وفاقی حکومت نے بین الاقوامی سوشل میڈیا اداروں سے مطالبہ کیا ہے کہ وہ فوری طور پر کالعدم دہشت گرد تنظیموں کے وہ اکاؤنٹس بند کریں جو اپنے پلیٹ فارمز پر پروپیگنڈا پھیلا رہے ہیں۔وزیر مملکت برائے قانون و انصاف بیرسٹر عقیل ملک اوروزیرمملکت برائے داخلہ طلال چودھری نے اسلام آباد میں پریس کانفرنس کرتے ہوئے سوشل میڈیا کمپنیوں سے تعاون کی درخواست کی ہے ۔
طلال چودھری کا کہنا تھا ہم دہشت گردوں کے اکاؤنٹس بلاک کرنا چاہتے ہیں، سوشل میڈیا پلیٹ فارمز فرضی اکاؤنٹس کو بند کریں اور فرضی اکاونٹس چلانے والے افراد کا ڈیٹا بھی وفاقی حکومت کے ساتھ شیئر کریں۔ جو اکائونٹس بتائے ہیں وہ تمام دہشت گرد گروپوں کے ہیں۔ا نہوں نے کہا کہ ہمیں نہیں معلوم کہ یہ اکاؤنٹس افغانستان سے یا کہاں سے آپریٹ ہو رہے ہیں، یہ اکائونٹس گمنام ناموں اور گمنام آئی ڈیز کے ذریعے چلائے جا رہے ہیں۔بیرسٹر عقیل ملک کا کہنا تھا پاکستان دہشت گردی سے بہت زیادہ متاثر ہوا ہے ، پاکستان کو دہشت گردی میں نہ صرف جانی بلکہ بھاری مالی نقصان ہوا۔ان کا کہنا تھا کہ ہم پاکستان میں سوشل میڈیا پلیٹ فارم کے دفاتر قائم ہونے کا خیر مقدم کریں گے ، بہت سے دہشت گرد گروپ ناصرف پاکستان بلکہ اقوام متحدہ کی فہرست میں بھی کالعدم ہیں۔وزیر مملکت برائے داخلہ کا کہنا تھا طلال نے نشاندہی کی تھی کہ یہ دہشت گرد گروپ واٹس ایپ چلارہے ہیں، یہ دہشت گرد گروپ ہمارے ملک، معاشرے اور پوری دنیا کیلئے خطرہ ہیں، پاکستان میں استعمال ہونے والے ان اکائونٹس کی نشاندہی کی گئی ہے جو ان دہشت گرد گروپوں کے ہیں۔ سکیورٹی حکام نے مختلف سوشل میڈیا پلیٹ فارمز پر 481 اکاؤنٹس کی نشاندہی کی، جو کالعدم دہشت گرد گروہوں سے منسلک ہیں اور ان اکاؤنٹس کے حوالے سے سوشل میڈیا کمپنیوں کو رپورٹ کر دی گئی ہے ۔انہوں نے سوشل میڈیا اداروں پر زور دیا کہ وہ ان اکاؤنٹس کے چلانے والوں کی معلومات فراہم کریں تاکہ دہشت گردی کے خلاف آپریشنز کو مزید موثر بنایا جا سکے ۔عقیل ملک کا کہنا تھا ہم زور دیتے ہیں کہ سوشل میڈیا پلیٹ فارم ناصرف ان اکاؤنٹس کی نشاندہی کرے بلکہ ان کو بلاک بھی کرے ۔ پاکستان دہشت گردی کے خلاف عالمی جنگ میں مضبوطی سے کھڑا ہے ۔
